МАХН-ын дарга Н.Энхбаярын хүү Э.Батшугарыг дэд сайд болно гэх таамаг шинэ эвслийн Засгийн газар байгуулагдсан цагаас хойш тасрахгүй байсан. Харин өнгөрсөн пүрэв гарагт МАХН-ын гүйцэтгэх товчоо хуралдаж Э.Батшугар биш Н.Энхбаярын төлөө юугаа ч өгөхөд бэлэн хуульч  Ж.Эрдэнэжамъяан, шадар туслах Б.Тулга нар нь дэд сайдад нэр дэвшлээ. Мөн УИХ-ын гишүүн асан МАХН-ын нарийн бичгийн дарга О.Чулуубат ч дэд сайд болохоор тодорлоо. Харин Э.Батшугарын нэр байсангүй.

Хууль зүйн дэд сайдад нэр дэвшсэн Ж.Эрдэнэжамъяан бол МАХН-аас УИХ-д жагсаалтаар нэр дэвшиж байсан, сүүлд “Н.Энхбаяр улс төрийн хэлмэгдүүлэлтэд өртлөө, иймдээ тулвал “Шударга ёс” эвсэл Засгийн гараас гарахад бэлэн” гэх зэргээр томчуудынхаа зөвшөөрөлгүй “бурж” байсан удаатай. Түүнийг чадварлаг хуульч гэдэг ч тэрбээр Н.Энхбаярын төлөө гал, ус руу ороход бэлэн хүн гэдэг. Тиймдээ ч дэд сайдын суудал руу “крандуулж” байна. Харин Б.Тулга “Н.Энхбаярын туслах” гэсэн тодотголтой, намын даргынхаа хэрэгт холбоотойгоор хэд хоног гомдлолгүй хоригдож байсан тул Байгаль орчин, ногоон хөгжлийн яамны дэд сайтдан болох гэж байна. Мөн О.Чулуунбат бол нэрс нь тодроод байгаа дэд сайд нар дундаа хамгийн ахмад нь бас туршлагатай нь. Н.Энхбаярыг баривчлах үеэр “сайн найз” гэдгээ харуулж чадсан. Гэхдээ тэрбээр УИХ-ын гишүүн, эсвэл яамны сайдын ажлыг өлхөн хийж чадах хүнсэн. Тэрбээр ийнхүү Эдийн засгийн хөгжлийн дэд сайд болж Н.Энхбаярын гараас хөтөлсөн “хүүхдүүд”-тэй нэг эгнээнд орох нь.
Харин Э.Батшугар аавыгаа баривчлагдсны дараа “Улс төр өөрөө намайг оролдсон. Би аавтайгаа хамт тэмцэнэ” гэж айхтар үг хэлэн улс төрд хөл тавихаа сүр, дуултиантай зарлаж байсан. Ээж О.Цолмон нь ч “Зүгээр байсан хүүхдийг та нар л ийм зам руу түлхлээ” гэх шүү юм ярьж байв. Харин тэр УИХ-д нэр дэвшсэн ч цэргийн алба хаагаагүй гэсэн шалтгаанаар хасагдсан билээ. Түүнд дэд сайд болох бүрэн боломж байлаа. Гэхдээ Н.Номтойбаяр  шиг “номгүй”-гээрээ цоллуулна гэхээс айсан гэж зарим нь ярьж байна. Ажлын туршлага багатай түүнийг дэд сайдын ажил хийх цаг нь болоогүй гэдгийг олон хүн хэлжээ. Хэвлэлийнхэн ч дэд сайдад тохирохгүй “жаал” гэж гайгүй сайн “гөвсөн”. Гэхдээ энэ бол Э.Батшугарын дэд сайд болоогүйн гол шалтгаан биш. Тэр зүтгэсэн бол аавынхаа нэрээр дэд сайдад нэр дэвших амархан. Тэрбээр Н.Энхбаярт хяналтын шатны шүүхээс ял оноовол амаа таглуулахгүй байхын тулд “бялууны хэрчим”-ээс татгалзжээ. “Аавыг чинь хэлмэгдүүлсэн тохиолдолд түүнийг суллуулах ажлыг чи л оройлон удирдах ёстой шүү” гэх зааврыг ээж  О.Цолмон нь өгсөн сурагтай. Тиймээс хяналтын шүүхийн шийдвэрийг харзнаж, бусаддаа зай тавьж өгчээ. Тэгээд ч МАХН-аас дэд сайдад очиж буй хүмүүс нь Н.Энхбаярын шалгарсан “цэргүүд” тул санаа зовох зүйлгүй ийм сонголт хийжээ.
Одоо МАХН-ын тангараг өргөөгүй нэг гишүүний хоосон суудал бий. Түүнд Э.Батшугар санаа тавьсаар байгаа гэдгийг МАХН-ын Гүйцэтгэх товчооны хуралд суусан гишүүд нь ярьж байна. Э.Батшугар дэд сайд болохгүй гэж шийдсэн ч УИХ-ын гишүүн болох санаанд нь багтсаар байга бололтой. Намын жагсаалтаар гишүүн болох аз байвал тэрбээр “АН-ын бялуу”-наас идсэн гэж хэлүүлэхгүй, нэр цэвэр аавынхаа төлөө зүтгэх болно. Э.Батшугар ээжийнхээ зөвлөгөөгөөр ийм сонголт хийжээ.