БНЭУ дахь нөхцөл байдал хүндэрсэн талаар бид удаа дараагийн сурвалжлага нийтлэлээрээ хүргэж ирсэн билээ. Тэгвэл Монгол Улсын Ерөнхийлөгч Х.Баттулга тус улс руу чартер онгоц хөөргөж иргэдээ татах саналаа УОК-ын ээлжит хуралдаанд оруулав. Комиссын ээлжит хуралдаанаар нислэг үйлдэх боломж бололцоог судалж яаралтай хариу өгөх шийдвэр гаргасан. Одоогийн байдлаар “Хүннү Эйр” компани тус улс руу нислэг үйлдэх боломжтой гэдгээ мэдэгдэж, УОК-т хүсэлтээ гаргаад байсан. Гэвч УОК-оос МИАТ компанийн тогтмол нислэг үйлддэггүй чиглэлд онгоц хөөргөхгүй байх тухайгаа мэдэгдэж, нислэг үйлдэхгүй гэдгээ баталгаажуулаад байсан.

Харин Ерөнхийлөгч Х.Баттулгын саналаар ямар нэг байдлаар Энэтхэг рүү нислэг үйлдэхээс аргагүй боллоо.

Гэхдээ “Хүнү Эйр” үү, МИАТ уу гэдэг асуулт урган гарч ирж байна. Учир нь БНЭУ-ын зүгээс чартер онгоц хөөргөх бол агаарын замаа нээж өгөхөөс эхлээд бүх талаараа дэмжлэг үйлдэх боломжтой ч онгоц гаргаж өгөх боломжгүй гэдгээ мэдэгдсэн. МИАТ компанийн хувьд олон улсад нислэг үйлдэх эрхтэй, энэ утгаараа чартер нислэг үйлдэхэд ямар нэг саад учрах нь бага. Харин “Хүннү Эйр” компанийн хувьд ийм зөвшөөрөл авахын тулд дипломат замаар хүсэлт гаргасан ч багадаа гурав хоног шаардлагатай гэдгийг мэдэгдээд буй. Гэхдээ Ерөнхийлөгч Х.Баттулгын зүгээс манай улсаас нислэг үйлдэх боломжгүй учир гаднын авиакомпани нислэх үйлдэх боломжийг судлах үүргийг УОК-т өгсөн байна.

Алин ч бай, нислэг үйлдлээ гэхэд гуравдагч оронд газардаж, онгоцоо шатахуунаар цэнэглэхээр эхлээд багагй хүндрэл гарах нь лавтай.

Хэдий ийм ч гэлээ тулгарсан саад бэрхшээлийг даван туулж, Энэтхэг улс дахь иргэдээ татан авчирч чадвал энэ Засгийн газрын хамгийн том гавъяаны нэг болох нь дамжиггүй.

Учир нь тус улсад коронавирусний халдвар эрчимтэй тархахын сацуу өлсгөлөн нүүрлэж, хоол хүнсний хомсдол үүсэж, тэр хэрээрээ нийгэмд эмх замбараагүй байдал үүсэх эрдэл үүсээд байгаа юм. Нөгөөтээгүүр, нутагтаа ирэх хүсэлтээ нийт 500 орчим иргэн гаргасан. Хэрвээ чартер онгоц хөөргөх боломжтой гэж үзвэл дээрх иргэдээс талаас илүү хувь нь үлдэх нь дамжиггүй. Учир нь МИАТ компанийн хувьд нэг удаадаа 270 орчим иргэн авчрах боломжтой бол "Хүннү Эйр" компанийн хувьд нэг удаагийн нислэгээр 88 иргэн авчрах боломжтой гэсэн. Энэ утгаараа УОК-оос гаргасан таван шаардлага хангасан иргэдийг нэн тэргүүнд татан авах нь тодорхой. Хэрвээ ийм нөхцөл байдал үүсвэл тус улсад урт болон богино хугацааны сургалтаар очсон залуус үлдэхээс өөр замгүй болох нь тодорхой.

Гэхдээ нэг удаа нислэг үйлдэж болсон юм хойно дахин чартер нисгэхгүй гээд хойш гэдийх нь юу л бол. Учир нь дээр хэлсэнчлэн БНЭУ-д халдвар эрчимтэй тархаж байгаа, дээр нь халууны улирал эхлэхтэй зэрэгцэн өлсгөлөн нүүрлээд буй. Энэ утгаараа Монгол Улсын иргэдээ үхэг гээд үлдээх нь юу л бол. тиймдээ ч Энэтхэгт гацсан иргэд Монголдоо ирэх эсэх найдвар Ерөнхийлөгчийн даалгавраар УОК-ын атганд үлдлээ.

Ингээд Монгол Улсаас БНЭУ-д суугаа Онц бөгөөд Бүрэн эрхэт Элчин сайд Г.Ганболдоос зарим зүйл тодруулснаа хүргэе.

-Энэтхэг улсад суугаа монгол иргэдээс яг хэдэн иргэн нутаг буцах хүсэлт гаргасан бэ?

-Нийт 488 иргэн өргөдөл гаргасан. Эдгээрээс 293 ламхай, өвчтэй, мэс засал хийлгэсэн 20-иод хүн бий. Гэхдээ зөвхөн нэг талдаа зорчигчтой тул тийзний үнэ жаахан өндөр байх талтай. Яг хэд орчим гэдгээс хамаарч буцах эсэхээ шийдэх хүн цөөнгүй гарах болов уу.

-Энэтхэгийн талаас агаарын замаа нээж өгөхөөс эхлээд шаардлагатай зүйлсээр тусална гэж байсан. Онгоц гаргаж өгөх боломжтой гэсэн болов уу?

-Тийм боломжгүй гэсэн. 

-Хөл хорио хэднийг хүртэл үргэлжлэх юм бэ?

-Энэ сарын 17-ныг хүртэл үргэлжилнэ. Одоогийн байдлаар олон улсын нислэг, нийтийн тээвэр гээд бүх үйлчилгээ зогссон байдалтай байна.

-Вирусний тархалт хэр байна вэ?

-Олон иргэнтэй томоохон хотуудад маш эрчимтэй тархаж байна. Ялангуяа Дели зэрэг хотуудыг “улаан” бүсэд хамруулсан. Ядуусын хороололтойгоо бүх үйлчилгээ нь зэрэгцэж байдаг гэдэг утгаараа эрсдэл өндөр байна. Тиймдээ ч Холбооны нутаг дэвсгэрийн захиргаанаас “Коронавирусыг хүлээн зөвшөөрч хамт амьдрах бэлтгэлээ хийх хэрэгтэй” гэж мэдэгдлээ.

-Энэтхэг дэх иргэдэд санхүүгийн дэмжлэг үзүүлэх саналаа та Гадаад харилцааны яаманд хүргүүлсэн. Энэ асуудал юу болсон бэ?

-Судалж байна гэсэн. Тодорхой хариу ирээгүй байна.

Г.Маргад