БНСУ-д хууль бусаар зургаан ажиллаж, амьдарч байсан монгол залуу өнгөрсөн сарын 27-нд цагаачлалын албаныханд зодуулж амиа алдсан билээ. Тиймээс тус залуугийн ар гэрийнхэн хэргийг монголын талд шилжүүлж, ядаж хоёр хүүхдэд нь насанд хүртэл нь тэжээх мөнгө нэхэмжлэх болсон талаар эх сурвалж мэдээллээ. Уг хэрэгт Солонгос дахь Монголчуудын эрх ашгийг хамгаалах нийгэмлэгүүд, сайтууд, хуулийн байгууллагууд дэмжиж ажиллахаа илэрхийлсэн байна. Хэргийг сануулбал, Талийгаач өнгөрсөн наймдугаар сарын 24-нд Солонгос улсын цагаачлалын албаны шалгалтанд өртөн, гурван монгол залуугийн хамт баригдсан юм. Харин гурав хоногийн дараа түүнийг уусан архиндаа хордон амиа алдсан хэмээн мэдэгджээ. Тиймээс талийгаачийн гэрийнхэн түүнийг нас барснаас тав хоногийн дараа БНСУ-д очжээ. Тэднийг БНСУ-д суух элчин сайдын яамны хоёрдугаар нарын бичгийн дарга Н.Батзориг, элчин сайдын яамны ажилтан Н.Өсөхбаяр нар тосч аван, Элчин сайдын яамны байранд авчирсан байна.
Тэд талийгаачийн гэр бүлийнхнийг Солонгос улсад суугаа тэдний хамаатан садан, найз нөхөдтэй уулзахыг тухайн үед зөвшөөрөөгүй бөгөөд талийгаачийн нас барах үеийн зураг болон бичлэгийг өөрсдөө олж авснаа урьдчилан үзүүлжээ.
Дуугүй зөвхөн дүрс нь бичигдэж үлдсэн таван цагийн бичлэгэнд эхний удаа 10-аад хүнтэй байсан өрөөнөөс хоёулахнаа байдаг өрөө рүү, улмаар ганцаараа байх өрөө рүү шилжүүлсэн дүрсүүд байсан аж. Ганцаараа байх өрөө рүү орохдоо хүчтэй түлхүүлэн арагшаа савж унан орж байгаа нь бичигдэн үлдсэн байна. Талийгаач хоёулахнаа байсан өрөөнд байхаасаа эхлэн гарахаар хаалга үүд, цонх балбаж, өшиглөж байсан ба ганцаараа байхдаа бие нь хямарсан байдалтайгаар тамираа тасартал аврал эрэн, хаалга үүдээ хоёр цаг гаруй нүдэж тусламж хүссэний эцэст өрөөнийхөө буланд байсан жорлонг тэврэн нас барсан байжээ.
Чимээгүй болсон талийгаачийн өрөө рүү хоёр харгалзагч орж, жорлон түшин суугаа байдалтайгаар гар хөл нь хөшиж , амьсгал хураасан талийгаачийг гаргаж ирж байгаа дүрс бичигдсэн байсан ба талийгаачийг анх ганцааранг нь нэг өрөөнд оруулахад байгаагүй гудас, түүнийг авахаар орсон харгалзагч нарыг ороход бичлэгт үлдсэн нь , ороо засах ямар ч чадвар, боломж болон цаг хугацаагүй байсан талийгаачийн сүүлчийн мөчүүдийн бичлэгт ямар нэгэн засвар орсон байх боломжтой гэж ар гэрийнхэн нь үзэж байгаа аж.
Мөн талийгаачийн цогцост ар гэрийнхнээс нь ямар нэгэн зөвшөөрөл авалгүйгээр, тэднийг Монголоос ирэхээс өмнө задлан шинжилгээ хийсэн байсан ба тэдэнд зөвхөн задлан шинжилгээ хийсэн зургуудыг үзүүлсэн байна.
Элчингийн байрнаас орой гарч талийгаачийн нас барсан хорихын өрөөг ар гэрийнхэнд нь үзүүлэн, эхнэрийг нь албан ёсны эхнэр мөн эсэхийг тодруулсанаар хэргийн газартай танилцах бүх үйл явц дууссан бөгөөд элчингийн ажилтан тэдэнд орчуулагч хийж байсан ажээ.
Тиймээс одоогийн байдлаар хэргийн газар дахин очиж үзэх, тодруулах, цагдаагийн газарт дахин хандах бүх асуудал дууссан төдийгүй, хэргийн газартай танилцах үед өмгөөлөгчөө дагуулан очих шаардлагатай эсэх талаар элчингийн ажилтнууд огтхон ч санаа тавиагүй байна.
Задлан шинжилгээний хариу хоёр сарын дараа гарах аж.
Талийгаач нь анх баригдахдаа эрүүл саруул, архи уугаагүй байсан бөгөөд гуравхан хоногийн дараа шоронгийн өрөөнд уусан архиндаа хордож нас барсан гэсэн оноштойгоор амиа алдсанд гэрийнхэн нь итгэхгүй байгаа юм байна.
Тиймээс шоронгийн өрөөнд согтотлоо, хордотлоо архи уух боломж байсан гэдэгт ар гэрийнхэн нь итгэхгүй, харин ч түүнийг амь насаа алдах хэмжээнд хүргэхээр зодож байсан шарх сорви бий эсэхийг нягтлан шалгуулахыг хүсчээ.
Б.Чимэг
