УИХ-ын гишүүн Р.Амаржаргал саяхан “Биокомбинат, дарханы төмөрлөгийн үйлдвэрийн удирдлагын асуудал Ерөнхий сайдын анхаарлыг яагаад татаад байна вэ?” хэмээн бичиж байсан. Үнэхээр улсын үйлдвэрийн газрууд Ерөнхий сайдын анхаарлыг ихээхэн татаж эхэлжээ. Саяхан Ерөнхий сайд Н.Алтанхуяг улсын үйлдвэрийн газруудын захирлуудыг дуудаж алдагдалтай ажиллаа гэж баахан зэмлэсэн. Мэдээж бүгдийг нь солихын тулд бэлтгэлээ базааж ард түмэнд “эд та нарын мөнгөөр туйлаад алдагдалтай ажилладаг юм байна шүү” гэдгийг харуулах жүжиг. Дараа нь ээлж дараалан солино. Ийм төлөвлөгөө гаргаад эхнээс нь хэрэгжүүлэх гэж байна.

    Эхний бай уулын баяжуулах "Эрдэнэт үйлдвэр" буюу ГОК. Хамгийн түрүүнд ГОК-ийн захирал Ч.Ганзоригийг солихоор Ерөнхий сайдын түвшинд тохирчээ. Мэдээж МАН-ын гол хүнийг тэнд удаан байлгахгүй. Харин ГОК буюу улс төрчдийн хэлдээгээр “саалийн үнээ”-ний захирлын төлөө АН-ын бүлэглэлүүд ил далд тулаан өрнүүлж Соцдекүүд ялжээ. Тэд одоогийн “Эрдэнэс Тавантолгой”-н захирал Б.Энэбишийг тавихаар тохирчээ.

   Энэ тохироонд АН-ын бүлэглэлүүдээс гадна орос ах нарын шахаа их байсан гэж эх сурвалж мэдээллээ. Учир нь Б.Энэбиш захирал орос ах нарын тун дотны хүн төдийгүй гар хөлийнх нь үзүүрт дуулгавартай захирагддаг, хамтран бизнес эрхэлж байсан хүн нь аж. Б.Энэбиш захирал "Эрдэнэс Тавантолгой"-н захирал болохоосоо өмнө “Бату майнинг” хэмээх Оросын хөрөнгө оруулалттай компанийн захирал байжээ. Уг компанийн нэр дээр 200 гаруй лиценз бий гэж нэг хэсэг шуугиасан санагдана. Тиймээс оросууд өөрсдийн эрх ашгийг хамгаалах үүднээс Б:Энэбишийг сайн лоббиджээ. АН-ын бүлэглэлүүд ч түүнийг бас лоббидсон. Ийм хоёр тохирооны үүднээс Б.Энэбиш "Эрдэнэт үйлдвэр"-ийн захирал болохоор шийджээ.

  "Эрдэнэс Тавантолгой"-н захирал Б.Энэбиш гэж хэн бэ? Тэрээр Ардчилсан холбоо эвсэл ялсан 1996-2000 оны орчим УИХ-ын тамгын газрын дарга байсан. Тэгээд дараа нь “Бату майнинг” гэж компанийн захиралаар ажиллаж байгаад төрийн өмчит “Эрдэнэс МГЛ” компанийн захирлаар томилогджээ. Хэн түүнийг төрийн өмчит компаний захирлаар тавьсан бэ? ЭБЭХ-ний сайд Д.Зоригт. Энэ томилгооноос болж МАН-ынхан Д.Зоригтыг үздэггүй юм. Учир нь төрийн өмчит компанийн захирал болчих хүн МАН-д дүүрэн байхад АН-ын хүнийг тавина гэдэг ямар ч стратеги бодлого байхгүйгээс гадна өөрийн намынхаа хүмүүсийг боддоггүйн шинж л дээ. Б.Энэбиш “Эрдэнэс МГЛ” компанийн захирал болонгуутаа АН-ын лидерүүдийн хамаатнуудаар компаниа дүүргэжээ. Удалгүй Д.Зоригт сайд “Эрдэнэс МГЛ” компаниас “Эрдэнэс Тавантолгой”, “Эрдэнэс Оюутолгой” гэсэн хоёр компанийг таслан байгуулсан. Тэгээд МАН-ынхан Б.Энэбишийг хал гэсэн шахалт үзүүлэнгүүт чөлөөлсөн нэрээр шинээр байгуулагдсан “Эрдэнэс Тавантолгой”-н захирлаар томилчихжээ. Шинээр байгуулагдсан “Эрдэнэс Тавантолгой” компанийн бүхий л даргаас авахуулаад хангамжийн менежер хүртэл ардчилсан намын гишүүдээр дүүргээд авч. МАН-ынхан Засаг барьж байсан мөртлөө тэнд бараг нэг ч хүнээ оруулж чадсангүй. Тухайн үеийн УИХ-ын гишүүн Батж.Батбаяр, З.Алтай, Л.Гантөмөр гээд ардчилсан хүчнийг баримтлагчидын үр хүүхэд хамаатан сатангууд энэ компанийн газар хэлтэсийн дарга болсон юм. Ингээд Б.Энэбиш АН-ын лидерүүдийн хүүхдүүдийг дэмжиж ажилд оруулж “даам гарчээ”. Тэр МАН-ын Засгийн үед АН-ынханд ингэж нэр нүүр олж авчээ. Соцдекээс угшилтай Б.Энэбиш ийнхүү АН-ын бүх л бүлэглэлүүдтэй сайн харилцаатай болж дөнгөсөн юм. Одоо түүнийхээ хүчинд ГОК-ийн захирал болох нь.

  Ийнхүү АН-ын аль ч бүлэглэлд тал алдаагүй Б.Энэбиш захирал уулын баяжуулах Эрдэнэт үйлдвэрийн захирал болох ээлжээ хүлээж байна. Уг нь түүнийг сайн эдийн засагч гэж олон хүн ам сайтай байдаг. Бас ноён нуруутай ч гэж үнэлэгддэг юм. Ямар ч байсан идээд уугаад, луйвардаад дуусгачихлаа гэж хэл аманд өртөж байгаагүй нэгэн.