Шинээр томилогдоод буй Цагдаагийн ерөнхий газрын дарга Б.Билэгт, Захиргааны удирдлагын газрын дарга, цагдаагийн хурандаа Д.Адьяабазар, Нийслэлийн цагдаагийн газрын дарга, цагдаагийн хурандаа Д.Батжаргал нар өнгөрсөн амралтын өдрүүдэд албаныхаа үйл ажиллагаатай танилцжээ. Тэд амралтын өдрөөр 00.00 цагаас хойш Сонгинохайрхан, Баянзүрх, Сүхбаатар дүүргийн захын гэр хороололд цагдаагийн ажил үйлчилгээг иргэдэд үзүүлж буй Баянхошуу, Дамбадаржаа, Шархадны цагдаагийн тасаг, Албадан саатуулах баривчлах төв, Хөдөлгөөнт эргүүлийн газрын машинт эргүүлийн зарим чиглэл, дотоодын цэргийн хамгаалалттай Хайлааст дахь усан сан, Баянзүрх дүүргийн цагдаагийн хэлтэс, эрүүлжүүлэх байрны ажил байдалтай танилцсан байна.
Цагдаагийн ерөнхий газрын дарга ажил үүрэг гүйцэтгэхэд учирч байгаа бэрхшээл, ажлын нөхцөл, хангалт, ахуй амьдралын талаар албан хаагчидтай ярилцаж, санал хүсэлтийг нь сонсч, үүрэг чиглэл өгчээ.
Б.Чимэг
