Улсын ерөнхий прокурорын дэргэдэх Мөрдөн байцаах албаны 10 жилийн ой өнөөдөр тохиож байна. Тэд цагдаа, тагнуул, шүүх, прокурорын байгууллагын ажилтны үйлдсэн гэмт хэргийг мөрдөн шалгадаг байгууллага юм. Энэ хугацаанд тус албанд иргэд, байгууллагаас гаргасан гэмт хэргийн шинжтэй 5948 гомдол, мэдээлэлд зохих шалгалт явуулснаас 1956 гомдол, мэдээлэлд буюу 32.9 хувьд нь эрүүгийн хэрэг үүсгэж, 2774 гомдол, мэдээлэл буюу 46.6 хувийг эрүүгийн хэрэг үүсгэхээс татгалзах санал гаргаж, 1218 гомдол, мэдээллийг буюу 20.5 хувийг харьяаллын дагуу зохих байгууллагад шилжүүлж тус тус шийдвэрлэжээ.
Нийт хүлээж авч шалгаж шийдвэрлэсэн 5948 гомдол, мэдээллийг төрлөөр нь авч үзвэл 2283 нь буюу 38.4 хувь нь хүний амь бие, эрүүл мэндийн эсрэг гэмт хэргийн, 1276 нь буюу 21.5 хувь нь шүүн таслах ажиллагааны эсрэг гэмт хэргийн, 464 нь буюу 7.8 хувь нь тээврийн хэрэгслийн хөдөлгөөний аюулгүй байдлын эсрэг гэмт хэргийн, 763 нь буюу 12.8 хувь нь өмчлөх эрхийн эсрэг гэмт хэргийн, 99 нь буюу 1.7 хувь нь захиргааны журмын эсрэг гэмт хэргийн, 727 нь буюу 12.2 хувь нь албан тушаалын гэмт хэргийн, 149 нь буюу 2.5 хувь нь нийгмийн аюулгүй байдлын эсрэг гэмт хэргийн, 187 нь буюу 3.1 хувийг бусад төрлийн гэмт хэргийн шинжийг агуулсан байна.
Гомдол, мэдээллүүдийг албан тушаалтнуудаар авч үзвэл шүүгчид холбогдох 200, прокурорт 204, мөрдөн байцаагчид 1108, хэрэг бүртгэгчид 641, цагдаагийн байгууллагын ажилтанд 3672, тагнуулын байгууллагын ажилтанд 59 гомдол, мэдээлэл иржээ.
Б.Золбоо
