Засгийн газрын ээлжит хуралдаан өнөөдөр болох хуваарьтай. Хуралдаанаар хэлэлцэх онцлох нэг асуудал нь есдүгээр сарын 1-нд хичээлийн шинэ жил эхлэх эсэх тухай. Өчигдөр хуралдсан Улсын Онцгой комиссын хуралдаанаар Боловсролын сайд Л.Цэдэвсүрэн есдүгээр сарын 1-нд сургууль, цэцэрлэгийн нээлтийг хэрхэн хийх эсэх талаараа хувилбаруудыг танилцуулсан тухайгаа илэрхийлсэн. 

Тэрбээр "2020-2021 оны хичээлийн жилийг хэрхэн зохион байгуулах талаар ажлын хэсэг байгуулан, судалж ажиллалаа. Боловсруулсан хувилбаруудаа Улсын Онцгой комисст танилцуулсан. Маргааш /өнөөдөр/ Засгийн газрын хуралдаанаар эцэслэн шийдвэрлүүлэх юм.

2019-2020 оны хичээлийн жилд нийт 75 өдрийн сургалтыг теле хэлбэрээр зохион байгуулсан. 2020-2021 оны хичээлийн жилд цэцэрлэгт 305 мянга гаруй хүүхэд, ерөнхий боловсролын сургуульд 682 мянга орчим сурагч, 150 мянган оюутан суралцах ёстой. Бүх шатгны сургалтын үйл ажиллагааг хэрхэн эхлүүлэх, ямар хувилбараар зохион байгуулах талаар УОК-оос өнөөдөр тодорхой чиглэлүүд авлаа.

Засгийн газрын хуралдаанаар эцэслэн шийдвэрлэнэ. Засгийн газрын албан ёсны шийдвэр гарсны дараагаар Боловсрол, шинжлэх ухааны яамнаас хэвлэлийн хурал хийж, зарлах болно" хэмээн мэдэгдсэн.

Сайд Л.Цэдэвсүрэнгийн тодотгосноор өнөөдрийн Засгийн газрын хуралдаанаар Ажлын хэсгээс хийсэн судалгаанд үндэслэж хичээлийн шинэ жилийн нээлт хийх эсэхийг шийдвэрлэх нь.

БШУ-ын сайд Л.Цэдэвсүрэнгийн нэмж тодотгосноор "Хичээлийн жилийг хэзээ эхлүүлэхийг олон талаар судалж байгаа. Есдүгээр сарын 1-нээс эхлүүлэх эсэх, эхлүүлсэн тохиолдолд ямар үе шаттайгаар зохион байгуулахыг ч судалж байгаа. Цэцэрлэг, ерөнхий боловсролын сургууль, их, дээд сургууль нь өөрсдийн гэсэн онцлогтой. Онцлог бүрт нь тохирсон хувилбарыг судалж, маргааш Засгийн газрын хуралдаанд танилцуулна" гэсэн юм.

Тэгэхээр салбарын шинэ сайдын зүгээс коронавирусийн цар тахлын хүрээнд хэрхэн сургууль, цэцэрлэгийн нээлтийг хийх, ямар шат дараатайгаар үйл ажиллагаа явуулахаар боловсруулсан судалгаа нь үндэслэлтэй, бодитой, хамгийн гол нь аюулгүй байдлыг хэрхэн хангасан эсэхийг Засгийн газрын хуралдаанд танилцуулснаар эцэслэх нь.

Цаашлаад сайд Л.Цэдэвсүрэнгийн эхний сорилт нь есдүгээр сарын 1-нд хичээл орох эсэх байх бололтой. 

Ерөнхий сайд У.Хүрэлсүх цэцэрлэг, сургуулийн үйл ажиллагааг есдүгээр сарын 1-нээс эхлүүлэх чиглэлийг БШУЯ-нд өгөөд байгаа юм.

Г.Эрхэс