Ерөнхийлөгч Х.Баттулга өнгөрсөн долоо хоногт Батлан хамгаалах яаманд ажиллах үеэрээ салбарын сайдаар ажиллаж байсан хүмүүсийг хүлээн авч уулзжээ. Уулзалтад Батлан хамгаалахын сайдаар ажиллаж байсан үе үеийн удирдлагууд болох Ж.Энхбаяр, Б.Бат-Эрдэнэ, Ц.Шаравдорж, Ш.Түвдэндорж, Ц.Цолмон, Ж.Гүррагчаа, Д.Дорлигжав, Л.Болд тэргүүтэй хүмүүс оролцсон юм. Үүнээс гадна Үндэсний аюулгүй байдлын зөвлөлийн Нарийн бичгийн дарга А.Гансүх, шинэ сайд Г.Сайханбаяр, хошууч генерал Д.Ганзориг тэргүүтэй БХЯ болон ЗХЖШ-ын удирдах бүрэлдэхүүн оролцож санал солилцсон байна.

Ерөнхийлөгчийг дагалдан явсан бүрэлдэхүүнд багтсан Зөвлөх Л.Болдын тухайн өмнө нь Батлан хамгаалах салбарыг удирдаж явсан нэгэн. Түүнийг нэмж тооцвол Төрийн тэргүүний уулзалтад есөн сайд оролцсон нь энэ.

Албан мэдээнд дурдсанаар Ерөнхийлөгч Х.Баттулга Батлан хамгаалах яаманд ажиллах үеэрээ тус яам болон Зэвсэгт хүчний Жанжин штабын удирдлагуудтай уулзаж, батлан хамгаалах бодлого, Зэвсэгт хүчний үйл ажиллагааны талаар санал солилцсон тухай мэдээлжээ.

Харин үе үеийн Батлан хамгаалахын сайд нартай ямар шалтгаанаар уулзсан тухай дурдаагүй байна.

Өөрөөр хэлбэл, М.Энхсайханыг Ерөнхий сайдаар ажиллаж байх үед танхимд нь Батлан хамгаалах салбарыг хариуцаж, ажиллаж байсан Д.Дорлигжаваас эхлээд одоогийн гүйцэтгэх засаглалын тэргүүн У.Хүрэлсүхийн Засгийн газрын гишүүнээр тодорсон генерал Г.Сайханбаяр хүртэл сайд нарыг ямар шалтгаанаар дуудаж уулзав гэдэг нь сонирхолтой сэдэв. 

Байсхийгээд говь нутгийг зорьж, төмөр замын бүтээн байгуулалтын ажилтай танилцах болсон Төрийн тэргүүн Батлан хамгаалах салбарын бодлогыг зангидаж явсан эрхмүүдийг эгнүүлэн суулгаж байгаад юу ярилцсан нь асуултын тэмдэг үлдээх шалтгаан болов. Монголын цэрэг арми, түүнийг тойрсон бодлого, зарим эрхлэх асуудал нь нууцын зэрэглэлд хамаардаг салбарын хөгжлийг 1996 оноос хойш тодорхойлоход гар бие оролцож ирсэн сайд нар Зэсвэгт хүчний ерөнхий командлагчтай зүгээр нэг цай ууж, хууч хөөрчихөөд тараагүй нь лав.

Г.Эрхэс