УИХ-ын ээлжит сонгуулийг өнжиж, намынхаа төв штабыг хариуцан ажилласан гишүүн асан Ж.Энхбаярыг Ерөнхий сайдаар улирсан У.Хүрэлсүхийн танхимд Батлан хамгаалахын сайдаар очих тухай яриа байсан ч тэр нь ёсоор болоогүй. Улмаар Ж.Энхбаярыг аль нэг агентлагийн даргаар очих тухай яриа өдөлж эхэлсэн юм. Тэгвэл Ерөнхий сайд У.Хүрэлсүх өөрийн ахлах зөвлөхөөрөө гишүүн асан Ж.Энхбаярыг томилжээ.

Түүний хувьд “12 жил УИХ-ын гишүүнээр ажиллалаа, одоо боллоо. Одоо өөр салбарт ажиллах цаг болсон. Нэг газар удаан суух зохистой биш. Зорилт тавьсан, түүнийгээ биелүүлсэн. Одоо улс төрийн шинэ замаар явна.

Улс төрд орсон зорилго маань Монгол Улсын Үндэсний аюулгүй байдлын үзэл баримтлал, батлан хамгаалах бодлогыг шинэчлэх, зэвсэгт хүчнийг хөгжүүлэх хөтөлбөрийг батлах, үүнтэй холбоотой батлан хамгаалах салбарын багц хуулиудыг өөрчлөх, цагдаа, дотоодын цэрэг, онцгой байдлын байгууллага, төрийн тусгай алба зэрэг тангараг өргөж мөрдэс зүүдэг байгууллагуудын хуулийг өөрчлөн шинэчлэх байсан.

12 жилийн хугацаанд энэ салбаруудын хууль, эрхзүйн орчин иж бүрэн шинэчлэлт оруулсан. Ж.Энхбаяр гэдэг хүн улс төрд орсон зорилгоо биелүүлсэн гэж үзэж байгаа учраас намаа энэ удаагийн сонгуульд ялуулахын тулд намынхаа штабын үйл ажиллагаанд оролцоно” хэмээн нэр дэвшээгүй шалтгаанаа тайбарлаж байсан удаатай.

Түүний хувьд 1996-2000 онд “Нэхий” ХХК, “Сүлжмэл” ХХК-ний Төлөөлөн удирдах зөвлөлийн дарга, “Газар” ХХК-ний захирлын албыг хашиж байгаад 2000-2002 онд Онцгой албан татварын гаалийн газрын дарга, 2002-2003 онд Улаанбаатар хотын гаалийн газарт хэлтсийн дарга, дэд дарга, 2004-2006 онд Гаалийн ерөнхий газарт зөвлөх, 2006-2008 онд Улсын мэргэжлийн хяналтын газрын дэд дарга, 2008 онд Улсын мэргэжлийн хяналтын газрын Тамгын газрын даргаар тус тус ажиллаж байв.

Мөн 2008-2012 онд УИХ-ын гишүүн, 2012 онд Батлан хамгаалахын сайдын албыг хашсан туршлагатай. 2016 оны сонгуулиар УИХ-ын гишүүнээр гурав дахь удаагаа сонгогдон ажилласан нэгэн.

С.Сүлд