Нийслэлийн Мэргэжлийн хяналтын газраас Барилгын хөдөлмөрийн аюулгүй байдал, барилга угсралтын үйл ажиллагаа явуулдаг байгууллагуудад хийсэн хяналт шалгалтын талаар мэдээлэл хийлээ.
Нийслэлийн зургаан дүүрэгт үйл ажиллагаа явуулдаг 327 аж ахуй нэгжид хяналт шалгалт хийж, 111 удаагийн 341 зөрчил илрүүлсэн байна. Хөдөлмөр аюулгүй байдлын норм дүрмийг хангаагүй дээрх аж ахуй нэгжүүдэд 134 сая 850 мянган төгрөгийн торгууль ногдуулж, зөрчил арилгуулах албан шаардлага хүргүүлсэн гэдгийг улсын байцаагч тодотголоо. Тухайлбал Хан-Уул дүүргийн 11 дүгээр хороонд баригдаж буй "Хурд майнинг", "Санк" ХХК, "АХХ мандал" ХХК, "Эко констракшин", "Бумбат" ХХК, "Даланбогд" ХХК-нууд зөрчилтэй байжээ.
Түүнчлэн энэ оны есдүгээр сарын байдлаар 90 удаагийн үйлдвэрлэлийн осол бүртгэгдсэн бөгөөд ослын улмаас 11 хүн нас барсан байна.