Ямар ч зохицуулалтгүй үйл ажиллагаа явуулж ирсэн ломбардууд удахгүй цэгцэнд орох нь. Ломбарданд яаралтай мөнгө хэрэг болсон хүмүүс “харилцан тохиролцсон” нэрийн дор тухайн газрын санал богосон хүүгээр эд хөрөнгөө барьцаалдаг. Хүү өндөртэйгөөс гадна алданги тооцно гээд тоочвол асуудал их.

Барьцаалсан эд хөрөнгөний хугацаа дуусвал эзэнд нь бичгээр мэдэгдэж байж тухайн эд, материалыг цааш зарж борлуулах ёстой ч утсаар мэдэгдсэн болоод л борлуулчихдаг. Эд хөрөнгөө алдсан этгээд хуулийн байгууллагад хандвал зээлдэгч, зээлдүүлэгч хоёрын гэрээ хүчинтөгөлдөр бус болох ч магадлал өндөр. Хоёр талын хүсэл зориг илэрхийлэгдээгүйн дээр бичгээр мэдэгдээгүй байж эд хөрөнгийг цааш зарж боруулснаас тэр. Гэвч иргэд энэ талаарх мэдлэг, мэдээлэлгүйгээсээ болоод хохироод үлдэх нь элбэг.

Тэгвэл хүссэн хүүгээрээ, хугацаа зааж бусдын эд хөрөнгийг барьцаалж зээл олгодог ломбардуудыг цэгцэлж хүү, алдангид хязгаар тогтоож өгөх хуулийн төслийг УИХ-ын гишүүн Х.Булгантуяа, Ж.Сүхбаатар нар боловсруулаад байна. Эдийн засагч, мэргэжилтэн, иргэдийн зүгээс чухал хуулийн төсөл хэмээн ам сайтай байгаа харагдана лээ.

Учир нь цар тахал дэгдсэн энэ үед айл өрхүүдийн орлого 40 хувиар саарч, цаашид ч хүндрэлүүд үргэлжлэх төлөвтэй байгааг мэргэжлийн байгууллагуудаас гаргасан. Э

нэ үед ломбарданд байгаа иргэдийн эд хөрөнгөнүүд эрсдэлд ороод байгааг түр журмаар зохицуулж, хуулийн төслийг ирэх оны долдугаар сарын 1-ээс хүчинтөгөлдөр мөрдүүлэхээр тусгажээ.

УИХ-ын гишүүн Х.Булгантуяа "Хүүг хэт өндрөөр тооцдог, алданги өндөр байдаг, хөрөнгийг багаар үнэлж авах зэрэг эдийн засгийн хүндрэл бэрхшээл үүсээд байна. Одоогоор үүнийг Иргэний хуулийн 289 дүгээр зүйлээр зохицуулж байгаа ч хуулийн дагуу үйл ажиллагаа явуулж байна уу гэдэг нь хяналтгүй. Энэ хууль батлагдтал тухайн салбар зохицуулалтгүй хэвээр байхаар байна. Тиймээс 2021 оны долоодугаар сарын 1-н хүртэл ломбардын хүүг гурван хувиас хэтрүүлэхгүй байх, алданги 0.2 хувиас хэтрүүлэхгүй, иргэдийн барьцаа хөрөнгийг зарж борлуулахгүй байх зохицуулалтыг хуулийн төсөлд оруулж өгсөн” гэдгийг онцолсон юм.

А.Сүх