Сүүлийн үед гаднын хэвлэлүүдээр УИХ-ын гишүүн Сү.Батболдтой холбоотой мэдээлэл хөврөх боллоо. Өмнө нь "Global Anti Corruption” сайтад түүнийг “Ерөнхий сайдаар ажиллаж байхдаа томоохон хоёр уурхайгаас хээл хахууль авч, хууль бус гүйлгээ хийсэн, мөнгө угаасан асуудалд холбогдсон. Уг асуудлаар өнгөрөгч арваннэгдүгээр сарын 23-нд Нью-Йорк хотын шүүхэд хавтаст хэрэг нээсэн” тухай дурдсан байв.

Тэгвэл өчигдөр “Times” сайтад “Дээд шүүхээс Монгол Улсын Ерөнхий сайд С.Батболдын 11 сая фунт стерлингийн үнэтэй орон сууцыг  зарж, шилжүүлж болохгүй гэж битүүмжилжээ. Түүнийг авлига авсан, мөнгө угаасан, улсынхаа томоохон хоёр уурхайгаас их хэмжээний ам.доллар авсан хэмээн буруутгаж байгаа юм” гэжээ.

Харин энэ талаар УИХ-ын гишүүн Сү.Батболд “Би төрөөс төрсөн тэрбумтан биш. Улс төрд орж ирэхээсээ өмнө улсад томоохон татвар төлөгч бизнесийг босгосон байсан” хэмээн хэвлэлд өгсөн ярилцлагадаа онцлоод шалгагдаж байгаа үнэн. Харин Монголын Засгийн газраас шүүхэд гомдол асуудал байхгүй. Гүтгэж байна гэж мэдэгдээд буй.

Түүнчлэн ирэх онд болох Ерөнхийлөгчийн сунгаатай холбогдуулан МАН-аас “шаардлага хангасан” нэр дэвших боломжтой таван хүний нэр зарласан. Үүний нэг нь Сү.Батболд. МАН-аас Ерөнхийлөгчид нэр дэвших магадлалтай хүнээр Ерөнхий сайд У.Хүрэлсүхээс гадна түүнийг нэрлэдэг. УИХ-д тав дахь удаагаа сонгогдсон, улстөрд нөлөө бүхий эрхэм гэдгээр нь шүү дээ. Энэ утгаар сонгуулийн жилийг угтаж гүтгэж, харлуулж байна хэмээн тайлбарласан нь ч бий.

Юутай ч түүнд гадны шүүх мөнгө угаасан, хээл хахууль авсан байж болзошгүй хэргээр хавтаст хэрэг нээжээ. Харин Сү.Батболдын хэлсэнчлэн “намайг гүтгэж, харлуулж байна” гэдэг үг “үнэнд гүйцэгдэх” нь цаг хугацааны л асуудал боллоо.

А.Сүх