УИХ-ын чуулганаар цар тахлын үед хийж хэрэгжүүлж байгаа ажлын талаар гишүүд сонсож байна. Энэ үеэр асуулт асууж, үг хэллээ.

С.Одонтуяа: Засгийн газрын өргөн барьсан заалтад гадаад байгаа иргэдийн эрх ашгийг хамгаалах талаар ямар заалт орсон бэ. Солонгост байгаа түр хамгаалах байранд Монгол Улсын 12 иргэн өлсгөлөн зарлаж байна. Түүний нэг нь хоёр сартай жирэмсэн эмэгтэй байна. Саяхан ХЭҮК-оос гадаадад байгаа иргэдийн нислэгийг зогсоох нь буруу гэж шаардлага хүргүүлсэнд баярлаж байна. Хараат бус байгууллага гарч ирсэнд.

Мөн ял эдэлж байгаа хүмүүсийн дархлаа их муу байгаа. Энэ хүмүүст НҮБ-ээс уриалга гаргасан. Ял эдэлж байгаа хүмүүсийн хүний эрхийг зөрчиж байгаа юм биш биз дээ.

Я.Содбаатар: Гадаадад байгаа иргэдээ татан авах ажиллагаа хүндрэлтэй байна. Өнөөдрийн байдлаар 49 тусгаарлах байр байна. Өмнө нь 71 байсан. Дам хавьтал байснаа ойрын хавьтал болоод өргөн хүрээтэй байгаа учраас байрны асуудал тулгамдаад байна. Иргэдээ татан авахдаа дотоодын нөхцөл байдал, тусгаарлах байрнуудаа харгалзаж байж хийнэ. Мөн тэнд байгаа иргэдийн эрх ашгийг хамгаалах чиглэлээр тодорхой арга хэмжээ авах ёстой. Нислэг нь цуцлагдсан иргэдэд тодорхой хэмжээний санхүүгийн дэмжлэг үзүүлсэн.

Бусад санхүүгийн хүндрэл бий болсон иргэдэд туслах талаар чиглэл өгсөн ч газар дээрээ удаашралтай байж магадгүй.

Мөн хөнгөн ялтай иргэдийн ялыг хөнгөлөх, чөлөөлөх асуудлаар хуульд тусгасан зүйл байхгүй. Ер нь асрамжийн газар, хорих байгууллага, эрүүл мэндийн газар хамгийн эрсдэлтэй гэж үзэж байгаа юм билээ.

Б.Лхам