УИХ-ын гишүүн Б.Энхбаяр УИХ дахь Ёс зүй, сахилга хариуцлагын байнгын хорооны бүрэлдэхүүнээс гаргаж өгөхийг УИХ-ын дарга Г.Занданшатараас хүсжээ.

Тодруулбал, УИХ-ын гишүүн, Ёс зүй, сахилга хариуцлагын байнгын хороон дарга Б.Бат-Эрдэнэ УБТЗ ХНН-ийн “Зорчигч тээврийн төв”-ийн Үйлдвэрчний эвлэлийн хорооны дарга Г.Өлзий-Оршихт бичсэн албан бичиг нь ихээхэн маргаан дагуулаад байна. Түүний хүргүүлсэн албан бичгийг ёсзүйгүй хандлаа гэж шүүмжилж байгаа хэд хэдэн гишүүн байр сууриа илэрхийлээд буй. Түүний нэг нь УИХ-ын гишүүн Б.Энхбаяр юм.

Тэрбээр байнгын хорооноос гарах болсон тухайгаа “УИХ-ын гишүүн Б.Бат-Эрдэнэ нь өөрийн албан бичигтээ УИХ-ын гишүүдийг ёс зүйгүй, хууль зөрчсөн үйлдэл гаргасан мэт, түүнд нь өөрөө хариуцлага тооцсон мэт үйлдэл гаргасан нь Монгол Улсын Их Хурлын тухай хуульд заасан бүрэн эрхээ хэтрүүлэн ёс зүйгүй, хууль зөрчсөн, гишүүнийхээ тангаргийн эсрэг үйлдэл гэж үзэж байна” гэжээ.

Б.Лхам