УИХ-ын чуулганы хуралдаанаар Цар тахлын хуулийг хэлэлцэж байна. 

Энэ үеэр УИХ-ын гишүүн С.Амарсайхан эрүүл мэндийн салбар хүнд байдалд орж байгааг анхаарууллаа. Тэрбээр “Эрүүл мэндийн яамныхан анхаарах ёстой зүйл хэлье. Цар тахлын үед эрүүл мэндийн тусламж үйлчилгээний бусад төрлүүдийг иргэд, оршин суугчдадаа эрх тэгш хүргэх ёстой. Хүн хүчээ зөв хуваарилахгүй бол түргэн тусламжийн дуудлага өгөхөд наанадаж 1 цагаас 1 цаг 30 минут болж байж ирж байна.

Энэ бол зөвхөн сургаар ярьж байгаа асуудал биш. Би зориуд утасдаж, өөрөө эрүүл мэндийн тусламж үйлчилгээ авах ёстой хүний дэргэд байж байж ямар хугацаанд яаж ирдэгийг нь үзсэн учраас хэлж байна.

Хоёрдугаарт, хэд хэдэн эмнэлгээр орж үзлээ. Тухайлбал, Улсын Хоёрдугаарт эмнэлэгт үзүүүлж байгаа иргэд тариураар бусад бүх шаардлагатай зүйлийг галнаас өөрсдөө авч байна. хөрөнгө мөнгөгүй, санхүүгийн чадваргүй иргэд эрүүл мэндээрээ золиослогдож байна.

Эрүүл мэндийн салбар ганхаж эхэлж байна шүү.

Та бүхэн онцгой анхаарахгүй бол зөвхөн ковид гэж явсаар ажил үүргийн хуваарилалт орхигдож байна. Төсөв хөрөнгөнүүд нь хуваарилагдахгүй байна. Улмаар эмнэлэгт найдаад очсон иргэдийг эм тариагаа гаднаас авчир гээд олдохгүй, авч чадахгүй эм тариа олж ир гээд хувь заяаг нь өөрсдөд нь даатгаад гаргаж байгаа эмнэлгүүд байна.

Гуравдугаар эмнэлэг байна. Ямар ч эмнэлгийн систем байхгүй. Нэг очсон хүнээс овог нэрийг нь долоон удаа асууж байна. Долоон удаа асуугаад ирсэн эмч бүр ямар шинжилгээ өгсөн, ямар эм уусан гэж асуудаг. Ямар ч нэгдсэн систем байхгүй. Хүн хүч, ажлын ачаалал нь дийлдэхгүй байгаа зэрэг асуудал байна. Онцгой комисс бүх хүчээ дайчилж байгааг хүндэлж байгаа. Гэхдээ амьдрал дээр асуудал байга шүү гэдгийг анхаараарай” гэлээ.

А.Сүх