УИХ-ын чуулганы хуралдаанаар Шүүгчийн эрх зүйн байдлын тухай хуульд нэмэлт, өөрчлөлт оруулах тухай, Прокурорын тухай хууль болон Авлигын эсрэг хуульд нэмэлт, өөрчлөлт оруулах хуулийн төслийг хэлэлцэх эсэхийг хэлэлцэж байна.
Энэ үеэр УИХ-ын гишүүн С.Ганбаатар дээрх хуулийн төсөлтэй холбогдуулан эрх баригч намаас ам асууж, Шүүхийн багц хууль эрх баригч намын дарга нарын заавраар болж байна хэмээн шүүмжилсэн юм.
Тэрбээр “Эрх баригчид хонгилын түлхүүрийг булааж байна. Хуулийн төсөл хэтэрхий субъектив байна. 62 гишүүн бярдаж байх шиг байна.
Үе үеийн Ерөнхийлөгчид шүүхийн эрх мэдэл давуу байдаг нь тасав баталдаггүй, зарцуулдаггүй учраас тэр.
Өнгөрсөн хугацаанд цагаан захтнуудын гэмт хэрэг ҮАБ-ын хэмжээнд хүрсэн. Энэ буцна гэсэн үг үү. Дээр нь Гокийн 49 хувь гээд цагаан захтнуудын том хэрэг ҮАБ-ын зөвлөл дээр шүүгч нарын асуудлыг шийдэж байж нааштай шийдэгдсэн. Энэ захиалгаар хийгдэж байна гэж үзэж байна.
Оюутолгой холбоотой МАН-ын том дарга нар шоронд байгаа. Тэдний захиалгаар Шүүхийн багц хууль орж ирж байна гэж үзэж байна. Хамгийн гол нь өнөөдөр Монгол Улсад шударга ёс хэрэгтэй байна. Ядуу байгаадаа, ажилгүй байгаадаа биш шударга бус байгаад бухимдаж байна. Үүнээс болж бид хямарч байна” хэмээн онцолсон юм.
Б.Лхам
