Шинэ бүрэлдсэн парламентад 11 суудал авч, сөрөг хүчнээр ажиллаж буй АН Эрдэнэ вангаа үдсэнээс хойш одоог хүртэл толгойгүй яваа. Уг нь өнгөрөгч арваннэгдүгээр сард намын Их Хурлаа зарлаж даргаа сонгохоор байсан ч үүссэн нөхцөл байдалтай холбогдуулан хойшлуулж саяхан улсын хэмжээнд цахим хурлаа хийсэн. Тус хурлаар намаа эзэнтэй болгохоос урьтаад дүрмээ өөрчлөхийг илүүд үзсэн нь олон хүнд эргэлзээ үүсгээд буй. Даргын түр орлогч байр сууриа тавьж өгөх дургүй байна гэдэг.

Гэтэл намын хурлын дараахан АН-ын дарга асан С.Эрдэнэ дээрх хурлаас гаргасан шийдвэрийг хүчинтөгөлдөр биш гэж үзэн Ц.Туваанд шилжүүлээд байсан намын даргын түр эрхийг цуцалж, тамга тэмдэгийг хүлээлгэн өгөх тушаал гаргаад байна. Ингэхдээ намын даргын тамга, тэмдгийг хүлээлгэн өгөхгүй бол хуулийн байгууллагад хандахаа мэдэгдсэн.

Учир нь намын даргаа түрүүлж сонгох байсан ч дүрмээ хэлэлцсэн нь хууль бус гэж тэр үзэж буй.

Харин АН-ын даргын үүргийг түр орлон гүйцэтгэгч Ц.Туваан “Энэ хугацаанд гаргасан бүх шийдвэр, үйл ажиллагаа ганц ч дүрэм зөрчөөгүй. Бүгд баримттай нотолгоотой явж байгаа” хэмээн хариу тайлбар гаргасан нь тус намын дотоод хагарал, эрх мэдлийн төлөөх тэмцэл мөд дуусахгүйг илтгэнэ.

Эрдэнэ ванг явсны дараах Ц.Тувааны удирдсан хагас жилийн хугацаанд ч ялгаагүй АН-д бодитой өөрчлөлт гарч чадсангүй. Намаа босгож, бэхжүүлэхээс илүүтэй эрх мэдэл, байр сууриа хадгалах нь илүү чухал гэдгийг л харуулж амжлаа.  

Дарга ч үгүй, байр ч үгүй.

Дээр нь хүчтэй ч сөрөг хүчин байж чадахгүй байгаад иргэд ихээхэн шүүмжлэлтэй хандаж байгаа. Ер нь дээрх хоёр эрхэм хэн нь ч байлаа АН тэднээр удирдуулж байгаа цагт олигтой дээшлэхгүй гэж л харагдаад байгаа юм.

Б.Лхам