Шударга тав хэмээн өөрсдийгөө нэрийдэж ирсэн Т.Аюурсайхан,  Лу.Болд, Ж.Батзандан,  Х.Нямбаатар, Л.Оюун-Эрдэнэ нар “МАНАН дэглэмийн эсрэг Монгол түмний нэгдэл” нэртэй сүржин жагсаалыг 2018 онд зохион байгуулж, УИХ-ын дарга М.Энхболдыг огцруулж байлаа.

Төв талбайд тэдний зохион байгуулсан  жагсаалын ирцийг Ерөнхийлөгч Х.Баттулгын МоАХ бүрдүүлж байсан гэдэг. Мөнгөний жагсаал хэмээн тухайн үедээ ч ярьж байв. Мөн албан тушаалын наймаа далд явсныг илчилж байсан хүмүүс бий.  Гэтэл өнөөдөр үнэнд гүйцэгдэж, энэ бүхэн ил болж байна.  Тухайлбал, шударга үнэний дуу хоолой гэгддэг тавын өндөрлөгт хүрсэн албан тушаалын эрэмбээр нь авч үзвэл,

-Монгол Улсын Их хурлын гишүүн, Монгол Улсын Их хурлын Дэд дарга Т.Аюурсайхан

-Монгол Улсын сайд, ЗГХЭГ-ын дарга Л.Оюун-Эрдэнэ

-Монгол Улсын Их хурлын гишүүн, Монгол Улсын Засгийн газрын гишүүн, Хууль зүй, дотоод хэргийн сайд Х.Нямбаатар

-УИХ-ын гишүүн асан, “ШИНЭ” намын дарга Ж.Батзандан Австрали улсад суух Элчин зөвлөх,

-УИХ-ын гишүүн асан Лу.Болд Монгол Улсын Ерөнхийлөгчийн  Аюулгүй байдал, батлан хамгаалахын бодлогын зөвлөхөөр ажиллаж байгаа ба түүнийг ХБНГУ-д суух Элчин сайдад нэрийг нь ярьж байгаа.

Т.Аюурсайхан, Л. Оюун-эрдэнэ, Х.Нямбаатар нар төрийн өндөр сэнтийд заларч суугаа бол Монгол Улсын Ерөнхийлөгч “өр”-өө төлж, Ж.Батзандан, Лу.Болд нарыг гадаад улсад суух Элчин сайдад зүтгүүлж буй.  Энэ байдлаас харвал, шударга тав маань тэмцлийнхээ үр шимийг хүртэж, санасандаа хүрч, сарвайснаа авчээ. Наанаа шударга царайлж, цаанаа албан тушаалын төлөө юугаа ч золиослоход бэлэн байсан тэднийг шударга тав хулхи тав болжээ хэмээн нэгэн эрхэм тодорхойлсон нь үнэний ортой гэлтэй.

У.Тэргэл