Нийслэлийн Засаг дарга бөгөөд  Улаанбаатар хотын Захирагч Д.Сумъяабазар нийслэлийн 2020 оны “Хөдөлмөрийн аварга”-уудад ажлын байран дээр нь өөрийн биеэр очин өргөмжлөл, шагналыг гардуулсан нь олны талархлыг хүлээгээд байна. Дуудаж ирэн шагналыг нь гардуулдаг хэвшмэл ёсыг эвдэн, ийнхүү гэнэтийн бэлэг барьсанд нийслэлийн  цаашлаад хүн ардынхаа төлөө хоёргүй сэтгэлээр зүтгэж буй ажилтнуудад   амьдралынх нь мартагдашгүй нэгэн дурсамж болон үлдсэн нь лавтай.

Хотын даргын бас нэгэн томоохон бэлэг нь  Нийслэлийн орон сууцны корпорациас хэрэгжүүлж буй “Орлогод нийцсэн орон сууц” хөтөлбөрийн түрээслээд өмчлөх хэлбэрийн орон сууцанд орох батламжийг олгосон явдал байлаа. Үүрийн хаяанаас үдшийн бүрий хүртэл хөдөлмөрлөж байдаг тэдний амьдралыг баталгааг хангаж, орон сууцтай болгож буй нь хамгийн том дэмжлэг байв. 2020 оны нийслэлийн “Хөдөлмөрийн аварга”-аар  хэн хэн шалгарсныг танилцуулъя.

-Нийслэлийн аврах 105 дугаар ангийн аврагч Батбаярын Үнэнмөнх, 

-Хот тохижилтын газар ОНӨААТҮГ-ын хог тээврийн автомашины жолооч Осорын Самданцэрэн,

-Сонгинохайрхан дүүргийн Замын цагдаагийн хэлтсийн замын зохицуулагч Батдэлгэрийн Баярхүү,

-Баянгол дүүргийн Эрүүл мэндийн төвийн сувилагч Шийнэнгийн Бямбасүрэн, 

-Хот тохижилтын газар ОНӨААТҮГ-ын зам талбайн үйлчлэгч Төмөрийн Батцэцэг нар юм.

Цар тахалтай холбоотойгоор хатуу хөл хорио тогтоосон энэ үед нийслэлчүүдийн дийлэнх гэртээ байгаа ч хотын өнгө үзэмж, нийслэлчүүдийн амар амгалан байдлын төлөө цаг наргүй ажиллаж буй ажилтнууддаа урам өгч, өөрийн биеэр ажлын байранд нь “зочилсон” Хотын даргын энэ үйлдэл нийслэлчүүдийг ч давхар баярлууллаа. Цагаа олсон шийдвэр, нүдээ олсон шагналд нь Хотын даргадаа талархлаа.

У.Тэргэл