Ерөнхийлөгч Х.Баттулгын оффшор бүсэд байгуулсан “Женко Холдинг Пи-Ти-И” компанийн ойрын үеийн онцлох сэдэв болж байна. Тус компанийг нэг сая ам.долларын хувь нийлүүлсэн хөрөнгөөр байгуулсан гэх.

“Женко Холдинг Пи-Ти-И” компани нь Сингапурт бүртгэлтэй аж. Компанийн тал хувийг түүний охин Б.Намуун, нөгөө талыг нь Сингапур улсын иргэн эзэмшдэг байна.

Ерөнхийлөгчийн өнгөрөгч сонгуулийн үеэрх түүний “топ” амлалтуудын нэг нь оффшор бүсэд байгаа хөрөнгийг Монголд оруулж ирэх байв. Энэ нь ч иргэдийн сонгох нэг шалтгаан болсон нь гарцаагүй. Ерөнхийлөгчийн  үүргийг гүйцэтгэсэн энэ хугацаанд мөрийн хөтөлбөрт тусгасныхаа дагуу оффшорчидтой хэр тэмцэв. Нийтэд ил байгаа мэдээллээр оффшор бүсэд данстай гэх нэр бүхий 49 хүнээс хэн нь тодорхойгүй ч 70 сая ам.доллар татсан байдаг. Угтаа бол амлалт ёсоор өдийд оффшор бүсээс 17 тэрбум ам.долларын хөрөнгө ороод ирчихсэн байх ёстой.

Энэ амлалтыг ч Ерөнхийлөгч Х.Баттулгаас хүлээх хэрэггүй боллоо.

Ирэх оны сонгуулийн хаяа ойртож байна. Үндсэндээ түүний хувьд Ерөнхийлөгчөөр ажиллаж өнгөрүүлсэн дөрвөн жилээ тайлагнах хугацаа ч мөн адил ойртож байна гэсэн үг. Харин иргэдэд сануулж хэлэхэд оффшор бүсэд хөрөнгөтэй хүнээс нөгөө оффшорчдын асуудал юу болсон л гэж асуудаггүй юм шүү. Асуух нь ч өөрөө утгагүй.

Уг нь чуулганы индэр дээрээс шударга ёс, тэгш эрхийн талаар тэр байнгын дурьдаж, эрх баригч намынханд сануулдаг. Түүний сүржин, даржин хэлсэн үгнүүдийг иргэд ч уухайлан дэмждэг байлаа. Одоо энэ шударга ёсыг таниас нэхмээр байна, Ерөнхийлөгч өө. Оффшор бүсээс нэр бүхий 49 хүний 17 тэрбум ам.долларын хөрөнгө оруулж ирэх яах вэ. Монгол Улс төрийн албан тушаалтнууд болон түүний хамаарал бүхий этгээдүүд оффшор бүсэд өмч хөрөнгөтэй байх, компанитай байхыг хуулиар хориглодог.

Бид хуультай улс. Нөгөөтээгүүр, та төрийн тэргүүн хүн. Энэ утгаар иргэддээ үлгэр жишээ болох ёстой. Шударга ёсыг та өөрөөсөө эхлүүлээч.

Б.Лхам