Ардчилсан намын удирдлагууд ээлж дараалан мэдээлэл хийж, эрх мэдэл, албан тушаалын төлөө тэмцэлдсээр Ерөнхийлөгчийн сонгуулийн жилтэй золгов. 2020 оны УИХ-ын сонгууль, орон нутгийн сонгуульд ээлж дараалан ялагдал хүлээсэн тус намынхан “унасан” даруйдаа л намын их хурлаа хийж, намын дүрэмдээ өөрчлөлт оруулах тухай “том” ярьж эхэлсэн. Гэсэн ч өнөөдрийг хүртэл дорвитой гаргасан шинэчлэл өөрчлөлтгүй, сандал суудлын хэрүүл нь үргэлжилсээр байгаа юм. Тэр ч бүү хэл өдгөө хоёр тамгатай, хоёр даргатай болчихоод байна.

Угтаа өмнөх гаргасан алдаа дутагдал, ялагдлынхаа алдаа оноог цэгнэж, ирэх онд болох Ерөнхийлөгчийн сонгуулийнхаа бэлтгэл ажлыг битүүхэн базааж байх учиртай атал ийнхүү удирдлагууд нь хагаралдаж, шуудайнд хийсэн эвэр шиг сууж байгаа нь Ерөнхийлөгчийн сонгуульд ялна гэж зүүдлэх ч хэрэггүй болсныг илтгэж байх шиг.

30 жилийн үүх түүхтэй Ардчилсан намын гишүүд дэмжигчид, ардчилсан хувьсгалын мянга мянган партизануудын итгэл үнэмшилийг хэдхэн хүн уландаа гишгэж, хувийн байгууллага мэт дур зоргоороо “тоглож” байгаад дургүйцэх хүн ч олон байна.

Үнэндээ альваа нам, эвслийн сүр хүч нь дарга удирдлага, тамга тэмдэгтээ бус, мянга мянган гишүүд дэмжигчдийн итгэл үнэмшил, сүр хүчинд байдаг гэдгийг Ардчилсан намын удирдлагууд эрх биш мэдэж, ойлгодог байлтай.

Ардчилсан нам 2020 оны УИХ-ын сонгуульд ялагдал хүлээхэд тус намыг толгойлж байсан С.Эрдэнэ хариуцлагаа хүлээгээд огцорч, түр орлон гүйцэтгэгчээр Ц.Тувааныг томилж, тамга тэмдгээ сүр дуулиантайгаар шилжүүлж өгч байсныг хэн ч мартаагүй.

Гэтэл өдгөө “Би Ардчилсан намын дарга хэвээрээ байгаа. Тамгаа дахин хэвлүүлээд авсан. Эрх мэдэл миний гарт ирсэн учраас хуучин байрандаа үйл ажиллагаагаа явуулна” хэмээн аархаж суух.

Чухам тэрбээр юуны учир ийнхүү дахин намын даргын сэнтийг булуулдах болов гэдэг нь олны анхаарлыг татаж байгаа юм. Харин С.Эрдэнэ үүнийгээ “Итгэл хүлээлгэсэн хүн маань намын дүрэм зөрчиж, итгэл алдсан тул ийнхүү “хөдөлсөн” хэмээн тайлбарлаж буй.

Харин Ардчилсан намын даргын түр орлон гүйцэтгэгч Ц.Туваан, ХЭГ-ын дарга Д.Нүрзэд нарын хүмүүс “С.Эрдэнэ эрх мэдлийн төлөө намын гишүүд дэмжигчдийн итгэл үнэмшлийг уландаа гишгэж байна. Бүх зүйл намын дүрмийн дагуу явж байгаа” гэдгийг онцолдог.

Ямартай ч улс төрийн томоохон хүчин болох Ардчилсан нам Ерөнхийлөгчийн сонгуулийн жилийг иймэрхүү л төрхтэй угтаж байна.   

Б.Баатар