“Хүүхдийн төлөө фонд”  тусгай сан байгуулж, бүхий л телевизээр “Монгол соёл-монгол хүүхэд”  хандивын тоглолтыг цахимаар зохион байгуулсан нь олон хүний шүүмжлэлийг хүлээгээд байгаа. УИХ-ын гишүүн асан Х.Тэмүүжин ихэд бухимдалтайгаар өөрийн сэтгэгдлээ ийнхүү хуваалцжээ.

Хуучин цагт “Хүүхдийн төлөө фонд” гэж Монголын төрийн хийх ажлыг нэг том даргын гадаад эхнэр булааж аваад өөрөө хийсэн болоод явдаг хойдуудын суртал ухуулгын сан байсан. Зардал нь Монголын төрд өр болоод үлддэг. Одоо хэний суртал, хэнд өр үлдээх сүнс босч ирж байгааг чөтгөр бүү мэд.

Шинээр байгуулсан Соёлын яам нь социалист үеийн үзэл суртлын яам болсон бололтой. Монгол Улсыг буцаагаад  социализм руу чирээд эхэллээ. Төсвөөс гадуур, засаг оролцсон сан байгуулаад, хандив нэртэй татвараар  тусдаа бодлого тодорхойлох шинжтэй болоод явчихлаа. Иргэдээс авсан татвараараа хийх ёстой байсан ажлаа хийгээгүй хулгайлчихаад нэмээд хандив өгчих одоо яг хийгээд өгье гээд байгаа юм уу даа. Социализмын үед даргын үг хууль байдаг байсан байж болно. Одоо бол хууль зөрчсөн дарга хариуцлага хүлээх ёстой нийгэм. Төр, төрийн бус холилдож, УИХ-ын зөвшөөрөл хяналтгүйгээр төсвөөс гадуур засаг мөнгө хурааж, зарцуулах бол уг нь албан тушаалын гэмт хэрэг. Төр сайн дураараа ямар нэг САН байгуулаад ажлаа хийчихдэг бол төсөв гэж байгаад яах. Тэрийг нь иргэд төлөөлөгчөө сонгож, тэднээрээ дамжуулан баталдаг байгаад бас яах вэ. Татвараас гадуур гоё нэртэй хандив санаачилж, төр иргэдээ тонох бол энэ хүнд цагт шударга биш шүү. Хүүхдүүдийнхээ төлөө иргэдийн төлсөн татварыг ууж идчихээд одоо хандив өгчих бид алаад өгье гэдэг бол увайгүй дээрэм. Өвчин зовлон ирлээ эм тариагаа бэлдье гэхэд усан оргилуур бариад гүйгээд байдаг нөхөд, хүүхдийн гэсэн бүхнийг хулгайлчихдаг дарга нар одоо дор бүрдээ дураар САН байгуулж, иргэдийн хоолны мөнгөнөөс ууж, иддэг болохоор шийдэж. Эд нар бүр сурчихлаа шүү. Санаачилж байгаа зүйл нь дандаа ардчиллаас ухарсан, хууль зөрчсөн, монгол хэлний хамгийн сайхан, сэтгэл хөдөлгөм үгийг өөрсдийн хулгайг халхлах пиар болгож, хөнгөн гоёчилсон урлаг уран сайхнаар  нухацтай, судалгаатай  бодох ёстой бодлого шийдвэрийг орлуулах гэж оролддог боллоо... ард нь ажил унасны хариуцлага хүлээх нэг ч хүн байхгүй.

Бүр хэтрээд төрийн албан хаагчдын цалинг хэн нэг дарга нь алба хаагчдаас өөрсдөөс нь асуулгүйгээр кампаничилж хандивладаг жишиг тогтоод удлаа. Бусдын цалинг өмнөөс нь хандивлах асуудлыг тухайн эрх мэдэлтэн албан тушаалаа хэтрүүлсэн үйлдэл гэж үзэж, хуулиар хязгаарлахгүй бол төр өөрөө хөдөлмөрийн мөлжлөг хийгээд байгаа мэт харагдах боллоо. Уг нь бусдын халаасанд хуруугаа дураараа хийхгүй байх гэдэг хүн ёсны энгийн соёл. Манай дарга нар дуртай үедээ ажлаас чинь халчихна шүү гэх заналхийллээрээ доод алба хаагчдынхаа цалин мөнгийг өмнөөс нь юунд зарахыг мэдэж, шийдэж болно гэж боддог бололтой. Жанжилах үзэл гэж ийм л ...

Төрийн өмчит аж ахуйн нэгжүүд ч мөн адил. Татварт төвлөрүүлэх орлогыг өөрсдийн хувийн мөнгө хөрөнгө шиг бусдад өгч, шагнах нь хэрээс хэтэрсэн. Ардаа авлигын сүүдэр хэтэрхий томоор дагуулсан байдалтай.

Монголд иргэнийхээ өмнө хүлээсэн үүргээ биелүүлсэн шиг биелүүлж, хийх ёстой ажлаа хийсэн шиг хийж, хариуцлагаа үүрсэн шиг үүрдэг төр л хэрэгтэй байна даа.

У.Тэргэл