Эрүүл сэндийн сайд Т.Мөнхсайхан, ХӨСҮТ-ийн захирал Д.Нямхүү нарын маргаан сүүлийн үеийн гол маргаануудын нэг байлаа. Эцэст нь зүгээр байгаа хүнийг ажлаа өг гэж шахсан, албан тушаалыг нь авахыг санаархсан хэмээн салбарын сайд нь баахан буруудаж, иргэдийн эсэргүүцэлтэй тулгараад үлдэх шив.

Гэхдээ эрүүл мэндийн сайд шинэчлэлийг зоригтой эхлүүлж чадсан. Хүнд цагт халаа сэлгээ хийж, ашиг хонжоо хайлаа гэж чичлүүлсэн ч тэр цуцаагүй. Эрүүл мэндийн салбарын чадалтай, сүйхээтэй эмч, дарга нар хувийн эмнэлэгтэй. Хоёр зэрэг ажилладаг, ер нь суудлаасаа ашиг хардаг хүмүүс гэдэг нь нууц биш. “Танил тал эсвэл хэд арван төгрөг атгуулж байж” гэж ярьдаг хүмүүс олон бий.

Ийм л хүмүүсээс тэр салахыг хүссэн. Салбарынхаа ужгирсан идээ бээрийг шахаж, шинэчлэлийг зоригтой хийхийг хүссэн.

Түүнээс биш мөнчгөрөөрөө ажлаа хийгээд, мөрөөрөө явж байгаа хүнийг хална гэдэг юу ч юм. Дээр нь ковид-ын үед шүү. Түмний итгэл, хайр хүндэтгэлийг хүлээгээд байсан Д.Нямхүү эмч хүртэл ковид-ын үеэр мөнгө завшсан байж болзошгүй асуудлаар шалгуулж байгаа юм билээ. Тэр нь баримтаар нотлогдсон тухай хэвлэлээр явж л байсан.

Т.Мөнхсайхан 2006 онд ГССҮТ-ийн их эмчээр ажиллаж байгаад 2016 оноос Ерөнхий захирлаар нь ажиллаж эхэлсэн. ГССҮТ-д ажиллаж байх хугацаандаа Монголд анх удаагаа үений дурангийн мэс засал, Хагас хиймэл үеийг солих мэс засал, Мөрний дурангийн мэс засал болон шөрмөс шилжүүлэн суулгах мэс заслуудыг тус тус нэвтрүүлэн нутагшуулсан төдийгүй Монголын түлэнхийн санг байгуулснаар жилдээ 0-5 насны 60 орчим хүүхэд түлэгдэлтээс болж нас бардаг байсныг 90 хувиар бууруулж, төлбөрийн боломжгүй бага насны хүүхдүүдийн зардлыг тус сангаасаа гарган эмчилдэг болгосон. Түүнийг эмнэлгийн захирал болсон хугацаанд эмнэлэг ч өнгө нэмсэн.

Түүнчлэн Улсын Нэгдүгэр төв эмнэлгийн захирлаар ажилласан жилийн хугацаанд Монголд анх удаагаа хоёр талт буюу амбулаторийн эмийн сан, цогц үзлэг, оношилгооны “Эрүүл мэндийг дэмжих төв”, эмчилгээний 10 орчим шинэ технологи, инновацийг нэвтрүүлж, 20 орчим эмчилгээ, үйлчилгээний томоохон дэвшилтүүдийг хийж, хэрэгжүүлжээ.

Тэрбээр Монголын томоохон хоёр эмнэлгийг сайн удирдаж, чадварлаг удирдагч гэдгээ өнгөрсөн хугацаанд батлан харуулсан хийсэн юмтай, хэлэх үгтэй л хүн.

Түүнийг эмнэлгийн захирлаар ажилласан хэсэг хугацаанд Нэгдүгээр эмнэлэг ч дотоод шинэчлэлээс гадна гадна төрхөө ч өнгөлөөд амжсан.

Тэр бол салбартаа хүлээн зөвшөөрөгдсөн мэргэжлийн залуу хүн. Салбарааа мэддэг түүнд итгэл найдвар төрж байгаа. Салбарын шинэчлэлийг хийхдээ ч олны эсэргүүцэлтэй тулгарна гэж мэдэж байсан ч шийдэмгий байж чадсан. “Ужиг” дарга нар нь л хохирогчийн дүрээр гарч ирснийг эс тооцвол. Гэлээ гэхдээ энэ хүн ийм тийм гэж Т.Мөнхсайхан нэг ч удаа гоншигнож байгаагүй.

Ташрамд дурдахад, Г.Шийлэгдамба салбарын сайд байхдаа ХӨСҮТ-ийн захирал Д.Нямхүүг хууль бусаар өөртөө цалин, урамшуулал нэмж олгодог, илүү цагийн хөлс авдаг нь тогтоогдсон учир ажлаас нь чөлөөлж байсан ч шүүхийн шийдвэрээр эргэн томилогдсон байдаг билээ. Д.Нямхүү эмчийн мэргэжлийн ур чадвартай нь маргах зүйл алга. Гэхдээ ХӨСҮТ-ийг 10 гаруй жил удирдахдаа яг ямар ажил хийв. ХӨСҮТ хэрхэн сайжрав. Өнгө ч нэмдэггүй, бахь байдгаараа орохын эцэсгүй газар гэж иргэд цахим сүлжээнд бичсэн байна лээ. Үнэхээр маргах хүн үгүй болов уу.  

Б.Лхам