Өнөөдөр оны сүүлийн отгон чуулган хуралдлаа. Хуралдаанаар Нийгмийн даатгалын шимтгэл төлөгчийг торгох шийтгэл, алдангиас чөлөөлөх тухай хуулийн төсөл болон Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төсөл, Авлигын эсрэг хуульд өөрчлөлт оруулах тухай хуулийн төсөл болон хамт өргөн мэдүүлсэн “Тогтоолын хавсралтад өөрчлөлт оруулах тухай” Улсын Их Хурлын тогтоолын төслийг хэлэлцэж баталсан юм. 

Хэлэлцэж буй асуудлуудтай холбогдуулан гишүүг үг хэлж, асуулт асуусны дотор УИХ-ын гишүүн Н.Алтанхуягийн хэлсэн үг анхаарал татаж байлаа. Тодруулбал, тэрбээр “Өчигдөр орой лав Монгол даяар найр наадам болох шиг боллоо. Нөгөө цар тахал нь хаачсан юм, юу болсон юм. Хажуугаар нь баахан социалист, реализмын үеийн аймар том суртал нэвтрүүлэг явж хандив цуглуулна гэх юм. Энэ ард түмэн чинь хандив өгөх нь бүү хэл өнөө маргаашаа яая гэж байгаа.

Бид ер нь хаашаа явж байна вэ. Түүнийгээ ярих цаг болсон байна. Юмыг магтан дуулдаг, болохгүй байгаа зүйлийг нухчин дардаг, дуу хоолойг нь боодог нийгэм рүү явж эхэллээ.

Соёлын яам гэж ийм яам байгуулах байсан юм бол шал дэмий дэмжиж.  Бид үүнийг шал өөр агуулгаар ойлгосон, маш харамсалтай байна. Өчигдөр миний нүдний нулимс гарлаа. Миний Монгол ийм юм руу явах ч гэж дээ. Хүмүүсийнх нь амьдрал юу болоод байгааг ерөөсөө мэддэггүй юм байна. Хөл хорио тогтоосноор юу болчихоод байгааг мэддэггүй юм уу, Содбаатар аа” хэмээн хатуухан шүүмжлэв.

Мөн үүнээс гадна УИХ-ын гишүүн Б.Энхбаяр өөрийн цахим хуудсаараа дамжуулан “Одоогийн хууль зүйн орчин төр иргэдээс хандив авах зохицуулалт байхгүй тул хуульчлагдаж байж л шийднэ. Засгийн газар энэхүү хуулиар байгуулагдах сандаа 10 тэрбумын эх үүсвэр шийдэж буйг Ерөнхий сайд тодотгож. Харин чоно борооноор гэгчээр Засгийн газрын хажуугаар Төрийн бус байгууллага байгуулж иргэдээс хандив авсан нөхдийн асуудал хуулийн өмнө очих биз.

Энэ мөнгө угаах шинжтэй гэмт үйлдэлд оролцсон Соёлын сайд, дэд сайддаа улс төрийн хариуцлага тооцох нь зүй ёс.

Энэ Төрийн бус байгууллагад өгсөн хандивыг Засгийн газрын тусгай санд дайчлан авбал зохино” гэсэн юм.

УИХ-ын гишүүн Б.Энхбаярын хэлснээр иргэдээс хандив цуглуулах нь хууль бус бөгөөд Соёлын сайд болон дэд сайд нарыг мөнгө угаасан хэмээн үзжээ. Мөн ХЗДХ-ийн сайд асан Х.Тэмүүжин “Төрийн албан хаагчдын цалинг хэн нэг дарга нь алба хаагчдаас өөрсдөөс нь асуулгүйгээр кампаничилж хандивладгийг тухайн эрх мэдэлтэн албан тушаалаа хэтрүүлсэн үйлдэл гэж үзэж болно” хэмээжээ.

Энэ мэтчилэн “Хүүхдийн төлөө фонд” үүсгэх тухай асуудлаар иргэд болон мэргэжлийн хүмүүс өөр өөрчдийн байр сууриа илэрхийлсээр байна.

Б.Лхам