Монгол Улсын Ерөнхий сайд У.Хүрэлсүх шинэ жилийн мэндчилгээ дэвшүүллээ. 

Тэрбээр "Эх орныхоо өнцөг булан бүрт амьдран суугаа эрхэм хүндэт иргэдээ, өргөн дэлхийн өнцөг бүрт суугаа оршин суугаа элэг нэгт ахан дүүсээ та бүхэндээ айлчлан ирж буй шинэ жилийн баярын мэнд дэвшүүлж, айл өрх бүрт аз жаргал, эрүүл энх сайн сайхан бүхнийг хүсэн ерөөе. Улиран одон буй 2020 коронавирусний цаг тахалтай нүүр тулсан хүндхэн жил байлаа. Хэдийгээр байдал хүнд байгаа бид улс үндэснийхээ аюулгүй байдал, ард иргэдийнхээ амь насыг сахин хамгаалж, аль болох хохирол багатайгаар энэхүү хүнд үеийг даван туулахын төлөө бүхий л хүч чадлаа дайчлан ажиллаж байна.

Монгол Улсын Засгийн газар айл өрх, аж ахуй нэгж, бизнесийн байгууллагыг дэмжих зорилгоор ус дулаан цахилгааныг төлбөрийг төрөөс хариуцаж, нийт 230 гаруй мянган айл өрхийн хэрэглэдэг сайжруулсан түлшний үнийг 75 хувиар буурууллаа. Ирэх онд хийгдэх онцгой чухал ажил бол Монгол Улсын Засгийн газар ДЭМБ-аас хүлээн зөвшөөрсөн сайн чанарын вакциныг эх орондоо авч ирж, ард иргэдээ цар тахлаас хамгаалах ажлыг цаг алдалгүй зохион байгуулах явдал юм. Энэ ажил Монгол Улсын Засгийн газрын онцгой анхаарлын төвд байх болно. Өргүй бол баян өвчингүй бол жаргал гэдэг билээ. Эрхэм хүндэт ард иргэдээ. Улиран одож буй 2020 онд төрийн тулгуур, улсын үндэс болсон айл өрхүүд маань 76 мянга гаруй бяцхан үрсээ өлгийдөн авч, монголчууд бид гурван сая 358 мянгуулаа боллоо. Малчин түмний маань нөр их хөдөлмөрийн үр дүнд буянт мал сүргийн тоо толгой 71 саяд хүрлээ. Олон Улс дахь манай улсын нэр хүнд сэргэж, саарал жагсаалтаас хамгийн богино хугацаанд гарсан улс болов. Шинэ ондоо иргэн бүр эрүүл энх, аз жаргал, инээд хөөрөөр дүүрэн байхын өлзийтэй ерөөлийг өргөн дэвшүүлье. Эх орон нэгт ахан дүүсдээ шинэ оны мэндийг дахин дэвшүүлье. Буурал дээдсийн цог хийморь түшиж, Бурхан халдун уулын ноён оргил монголчууд биднийг үргэлж ивээх болтугай" гэв.