УИХ-ын гишүүн асан Ц.Оюунгэрэл Ерөнхийлөгчийн сонгуульд нэр дэвшихээ зарласан нь өнөөдрийн цочир мэдэгдэл байлаа. Оны эхний сэвэх сэдэв ч энэ болов бололтой. Түүний энэхүү гэнэтийн мэдэгдэл олныг талцуулж, зарим нь хамгийн боломжит хувилбар хэмээн хүлээн авч байхад өдгөөгийн Ерөнхийлөгчийн хаана ч хүрэхгүй гэх нь ч байна.

Ц.Оюунгэрэлийн хувьд хүний эрхийн чиглэлээр нийгэмд дуу хоолойгоо хүргэж ирсэн. Сүүлчийн хэдэн жил хөрсний бохирдлын тулгамдсан асуудлыг шийдэхийн тулд “Жорлонгоо өөрчилье” төслийг санаачлан хэрэгжүүлж, үр дүнд хүрээд байгаа. Мэдээж, Жаран цагаан хонь,  Ногоон нүдэн лам номын зохиогч гэдгээр нь нийгэм андахгүй. Харин энэ удаад тэрбээр намаасаа Ерөнхийлөгчийн сонгуульд нэр дэвшихээ зарлан, ковидын дараа тулгарах олон асуудлаас бодлогын шийдэлд гар бие оролцох, дэлхийн дулаарал зэрэг глобал асуудлаас монголчуудад учрах эрсдэлийг багасгахад хувь нэмрээ оруулах зорилгоор хэмээн тодотгожээ.  Түүнийг харлуулах, иргэдийн шүүмжлэлийг өрнүүлээд байгаа гол зүйл нь гадаадын иргэнтэй гэр бүл болсон явдал юм.

Тиймдээ ч иргэд уухайлан хүлээн авахгүй ч бас тэгтлээ буруушаахгүй, тэг дундуур нь хүлээн авч байна. Ямартай ч, Ц.Оюунгэрэлийн хувьд Ерөнхийлөгчийн сонгуульд нэр дэвшин өрсөлдөхөө зарласан хоёрдахь эмэгтэй болж байна. Үүний өмнө МАХН-аас Эрүүл мэндийн сайд асан Н.Удвал өрсөлдөж байсан билээ.

У.Тэргэл