Зарлагдсан хөтөлбөрүүдээ цуцлан байж 13 телевиз “Бүхнийг хүүхдийн төлөө” хандивын теле концертыг шууд дамжуулсан нь он дамнасан маргаан дагуулсан. Улс төрийн пиар хийгээд учир шалтгааны эхлэлийг хайсан олон маргаан дундаас маргах аргагүй анхаарах зүйлийг УИХ-ын гишүүн Б.Энхбаяр хэлсэн.

Тэрбээр, “Одоогийн хууль зүйн орчин төр иргэдээс хандив авах зохицуулалт байхгүй тул хуульчлагдаж байж л шийднэ. Засгийн газар энэхүү хуулиар байгуулагдах сандаа 10 тэрбумын эх үүсвэрийг шийдэж буйг Ерөнхий сайд тодотгосон байсан. Харин чоно борооноор гэгчээр Засгийн газрын хажуугаар ТББ байгуулж иргэдээс хандив авсан нөхдийн асуудал хуулийн өмнө очих биз.

Энэ мөнгө угаах шинжтэй гэмт үйлдэлд оролцсон Соёлын сайд, дэд сайддаа улс төрийн хариуцлага тооцох нь зүй ёс…” гэсэн юм. Нэг өгүүлбэрээр бол Засгийн газар тусгай сан байгуулна аа гэчихсэн байхад Төрийн бус байгууллага байгуулаад түүндээ төрийн өмнөөс ард иргэдээс хандив цуглуулах нь хууль бус гэдгийг л тэр хэлсэн.

Хүүхдийн төлөө гэсэн сайхан уриагаар халхавч хийн хандив цуглуулсан нь хуулийн дагуу эсэх дээр хуульч гишүүний дээрх үгтэй маргах хүн ховор биз. Тэгэхээр энэ сэдвийг түр орхиод маргаан дагуулсан дараагийн сэдэв рүү орцгооё. Тэр нь “Хүүхдийн төлөө фонд” хэн гэдэг улстөрчийн PR байсан талаархи маргаан.

Өнгөрсөн гурван өдрийн хэвлэл хийгээд сошиалаар гарсан мэдээллүүд, сэтгэгдлүүдээс шүүрдвэл энэхүү хандивын тоглолтыг ирэх сонгуульд бэлтгэсэн төрийн тэргүүний PR гэх нь олон байна. Магадгүй “Хүүхдийн төлөө фонд” Төрийн бус байгууллагын Удирдах зөвлөлийн гишүүдийн нэг нь “Хэро интертаймент”-ийн захирал Б.Баатар байсантай энэ нь холбоотой байх. Бас Ерөнхийлөгч Х.Баттулга 2019-2020 оныг “Хүүхдийн төлөө жил” болгон зарлаж байсантай нь ч холбоотой байх. Өнгөцхөн харвал энэ хамгийн байж болох хардлага. Харин ухаад үзвэл бас л өөр дүр зураг гарч ирнэ.

“Хүүхдийн төлөө фонд” Төрийн бус байгууллагыг арванхоёрдугаар сарын 17-нд Б.Баатар, Х.Дамдинсүрэн, М.Батбаяр нар байгуулжээ.

Б.Баатар нь “Хэро интертаймент”-ын үүсгэн байгуулагч, Ерөнхийлөгчийн PR-чин, нөгөө талаас Засгийн газрын Хэрэг эрхлэх газрын дарга, Монгол Улсын сайд Л.Оюун-Эрдэнийн төрсөн ах. Х.Дамдинсүрэн бол “Sound of Mongolia”-ын үүсгэн байгуулагч, Ерөнхий сайд У.Хүрэлсүхтэй ойрхон ажилладаг нэгэн.

Оны өмнөхөн Засгийн газрын квотоор МҮОНРТ-ийн Үндэсний зөвлөлийн гишүүнээр эхнэр М.Уянга нь томилогдсон.

Харин М.Батбаяр нь Соёлын дэд сайд, МАН дахь Хэнтийн фракцын залуу төлөөлөл. Ийм гурван хүн хандивын тоглолт болохоос 13 хоногийн өмнө нэгдээд “Хүүхдийн төлөө фонд” Төрийн бус байгууллагыг байгуулжээ.

Ийм бүрэлдэхүүнтэйгээр нэгдсэн гурав ТББ-ынхаа Гүйцэтгэх захирлаар жүжигчин Г.Ундармааг томилжээ. Жүжигчин Г.Ундармаа бол “Эм Си Эс” группийнхны үеэл, “Анун” төвийг нь хариуцаж ажилладаг байсан гэдгийг уншигчид андахгүй биз.

Ингээд “Хүүхдийн төлөө фонд”-ынхон Соёлын сайд С.Чулууны санаачилгаар “Бүхнийг хүүхдийн төлөө” хандивын тоглолтыг зохион байгуулсан байна.

Дахиад л ганц тодотгол. Соёлын сайд С.Чулуун бол У.Хүрэлсүхийн танхимд томилогдохоосоо л салбарынхныхаа эсэргүүцэлтэй тулгарсан, ердөө хэдхээн хоногийн өмнө “Түүхээ худалдсан түүхчид” цуврал нэвтрүүлгийн “Гол дүр” болон “балбуулсан”, нэг үгээр хэлбэл сайдын суудал нь дээсэн дөрөөн дээр дэнжигнэн байгаа сайд.

Нэг л эс үйлдэл нь түүнийг танхимаасаа гаргах шалтаг болж Ерөнхий сайдад очно. Эндээс үзвэл Б.Баатарыг эс тооцвол бусад нь Ерөнхийлөгчийн санаачилгыг дэмжээд, зохион байгуулаад, 2 тэрбум 222 сая төгрөг босгоод явах хүмүүс гэж харагдахгүй байна. Тодруулбал, төрийн тэргүүн Х.Баттулга энэ удаа Хойд талын хар овоохой болчихсон юм биш биз?

С.Сүлд