Монгол Улсын Ерөнхийлөгч Х.Баттулга он солигдох агшинд чухам ямар бэлэг барих бол гэсэн хүлээлт ард түмний дунд байсан ч “хоосон” хоцров. Өнгөрсөн жил он солигдох мөчид Ерөнхийлөгч ахмадуудын тэтгэврийн зээлийг тэглэх шийдвэр гаргаж буйгаа дуулгаж олон хүний магнайг тэнийлгэж байсан билээ. Тиймээс ч энэ жил мөн ямар нэгэн бэлэг барих байх гэсэн хүлээлт олны дунд байсан нь нууц биш. Зарим нь цалингийн зээлийг тэглэж магадгүй гэж байсан бол нөгөө хэсэг нь өрх бүрт дэмжлэг үзүүлэх нэг сая төгрөгөө “амлаж” мэднэ гэлцэж байв.

Гэсэн ч Ерөнхийлөгч Х.Баттулга “Өрх бүрт нэг сая төгрөгийн дэмжлэг үзүүлэх тухай санаачилгаа дахин дэвшүүлж байна” хэмээн олны амыг “таглаж”, улс төрд бядгүй байна гэдгээ нотлолоо.  

Тэрбээр өмнө нь цар тахалтай холбоотойгоор иргэд, аж ахуй нэгж, үндэсний үйлдвэрлэгчдээ дэмжиж, өрх бүрт нэг сая төгрөгийн дэмжлэг үзүүлэх санаачлага гаргаж байсан. Гэвч МАН-ынхан илүүрхэж, түүний саналыг хүлээж авалгүй “унагаж” байсан билээ. Гэсэн ч ганц дайчин ганцаардахгүй гэгчлэнгээр Ерөнхийлөгч өнөөх л улиг болсон нэг сая төгрөгийн дэмжлэгээ ярьсаар шинэ оныг угтав. Үнэндээ  ч тэрбээр толгой мэдээд дээрх шийдвэрийг гаргах бядгүй хойно ийнхүү улиас унагаж суухаас өөр яах билээ.

Нөгөөтээгүүр, Ерөнхийлөгч шинэ оны мэндчилгээнийхээ үеэр оффшор дансгүй гэдгээ цэвэрхэн гэгч нь хавсаргав.

Ерөнхийлөгч Х.Баттулгыг оффшор данстай, тус дансанд буй мөнгөө эх орондоо оруулж ирэх ёстой гэх мэдээлэл оны өмнөхөн гадаад дотоодын хэвлэлүүдээр шуугиан тарьсан.

Тодотговол, Сингапурт бүртгэлтэй "Женко Холдинг" компаний 50 хувийг түүний охин Б.Намуун, үлдсэн 50 хувийг Ерөнхийлөгч Х.Баттулгын хөрөнгө оруулалтын менежер Билли Лимийн хүү Деннис эзэмшдэг гэх. Ерөнхийлөгчийн охин Б.Намуун Сингапурийн “Overseas Family School”-д суралцаж байсан нь ч энд компаниа бүртгүүлж үйл ажиллагаа явуулахад нөлөөлсөн болохыг зарим хэвлэлүүд онцолж байсан. 

Мөн “Женко Холдинг” компанийг нэг сая ам.долларын дүрмийн сантай байгуулсан тухай болон Х.Баттулга Монголд “Камекс” компани байгуулж, түүний охин компаниуд нүүрс, алт, зэсийн үнэт 17 лицензийг авсан талаар мөн гадны хэвлэлүүд бичиж байв. 

Энэ мэтээр Ерөнхийлөгч Х.Баттулгыг оффшор бүсэд данстай гэх мэдээлэл дахин олны анхаарлыг татаад байсан юм.

Тэгвэл Ерөнхийлөгч эл асуултад хариулт өгөв. Тэрбээр он солигдох мөчид “Сүүлийн гурван жилийн хугацаанд хууль хяналтын байгууллагын нийт албан хаагчид маань олигархуудын оффшор бүсэд нууцалсан асар их хэмжээний хууль бус хөрөнгийг нь илрүүлж, буух эзэнтэй, буцах мөртэй эзэн холбогдогчдыг нь тогтоосоор байна.

Миний бие Ерөнхийлөгчөөр сонгогдсоноосоо хойш хууль хяналтын байгууллагуудыг хуулийн хүрээнд хараат бусаар чиг үүргээ хэрэгжүүлэхийг удаа дараа шаардаж байсныг та бүхэн мэдэж байгаа.

Шударга ёсыг сахин хамгаалах тэмцлийнхээ хүрээнд хууль хяналтын байгууллагын албан хаагчид төрийн нэрийн өмнөөс нийтийн эрх ашгийг хамгаалж, ард түмний өмнө хүлээсэн үүргээ үнэнчээр биелүүлж байна” хэмээсэн. Энэ нь түүнийг оффшор бүсэд дансгүй болохыг нотолж буй хэлбэр хэмээн онцлох хүн олон байна.

Б.Баатар