Баянзүрх дүүргийн нэгдсэн эмнэлэгт эмчлэгдэж байсан иргэн Ковид-19" халдвараар нас барсан байх магадлалтай гэх мэдээлэл гараад буй. Тодотговол, Баянзүрх дүүргийн нэгдсэн эмнэлэгт маш хүнд оноштой хэвтэн эмчлүүлж байсан нэг иргэн 2020.12.24-ны өдөр нас барсан. 

Тухайн иргэн коронавирусний дагалдах оноштой ч цээжний булчин сулрах өвчтэй, амьсгал зүрх судасны даамжирсан дутагдалтай, артерийн даралт ихсэлттэй, чихрийн шинжингийн хэв шинж хоёртой, элэгний С вирусийн архаг үрэвсэлтэй 76 настай иргэн байсан. Улмаар үндсэн өвчин буюу зүрх судасны дутагдлаар нас барсан байдаг.

Тэгвэл олон улсын байгууллагаас дээрх нас барсан иргэнийг коронавирусний халдвараар нас барсан болохыг мэдээлсэн юм. Энэ талаар Эрүүл мэндийн сайд Т.Мөнхсайхан мэдээлэл өглөө. Тэрбээр "Коронавирусний халдвартай хүн нас барсан учраас олон улсын байгууллагын бүртгэлд орсон. Гэвч тухайн иргэн архаг өвчтэй, БЗД-ийн нэгдсэн эмнэлэгт эмчлэгдэж байсан маш хүнд хүн байсан. Ковидын халдвар авсан ч үндсэн буюу бүх биеийн булчингийн сулрал оношоор нас барсан" гэв. 

Б.Баатар