Монгол Улсын Ерөнхийлөгч Х.Баттулгын хувь эзэмшдэг компаниуд болон ах дүүс нь их хэмжээний зээл авдаг ч эргүүлэн төлөхдөө хойрго хандаж иржээ.

Тухайлбал, Ерөнхийлөгчийн хувь эзэмшдэг “Мах импекс” ХХК 2015 онд  Үнэ тогтворжуулах хөтөлбөрийн хүрээнд жилийн 3,8 хувийн хүүтэй 16,5 тэрбум төгрөгийн  зээл авчээ. Мөн түүний төрсөн дүү Х.Баттуулын эхнэр Н.Алтанцэцэгийн үүсгэн байгуулсан “Милл хаус” ХХК нь Мал хамгаалах сангаас хоёр тэрбум төгрөгийн хүүгүй зээл авсан байдаг.  Хоёр тэрбумын ердөө 400 саяд нь тэжээл импортлосон гэдэг ч үлдсэн 1,6 тэрбумыг өдгөөг хүртэл төлөөгүй явж иржээ. Мөн “Милл хаус” ХХК нь Тариалан эрхлэлтийг дэмжих сангаас 2,2 тэрбумын санхүүжилт авч, ямар ч сонгон шалгаруулалтгүйгээр үрийн буудай нийлүүлсэн зэрэг өр, зээлийн баримтууд ил болсоор байна. Хамгийн ноцтой нь, “Мах импекс”-ийн авсан 16,5 тэрбумын зээлийг эргүүлэн төлсөн эсэх, ямар хуваариар гэх бүх баримт бичиг архиваас устсан байна.

Асуудал үүгээр дуусахгүй. Х.Баттулгын 2007-2008 онд үүсгэн байгуулсан “Камекс” компанийн охин компани болох “Төгрөг нуур энержи” ХХК нь “Цэвэр агаар” сангаас нэг сая ам долларын татаас авч, утаагүй түлш үйлдвэрлэхээр болж,  тэрбээр өөрийн биеэр үйлдвэрийн нээлтэд очин, тууз хайчилж байлаа. Нэг сая ам. доллар буюу 2,9 тэрбумын татаас улсаас авсан ч энэхүү үйлдвэр нь нэг ч шуудай түлш үйлдвэрлээгүй. Харамсалтай нь, энэ талаар хэн ч шахаж, шаарддаггүй.

Ерөнхийлөгч маань хамгийн сүүлд Ерөнхийлөгчийн сонгуулийн үеэр сонгогчдын саналыг худалдан авах зорилгоор 1,8 тэрбум төгрөгийг бэлнээр авч яваад баригдан хуулийн байгууллагад шалгуулж байв. Гэвч сонгогчдыг худалдан авах гээгүй, үйл ажиллагааны зардал байсан хэмээн мэлзэж, мөн л уснаас хуурай гарч байсан түүхтэй.

У.Тэргэл