УИХ-ын гишүүн Ш.Адьшаа, Б.Энхбаяр нарын хоорондын сөргөлдөөн ширүүсч, чуулганы танхимд бие бие рүүгээ дайрч давшлах нь ердийн үзэгдэл боллоо.

Б.Энхбаяр гишүүн гэхэд л шударга бусын хонгилоор та олон удаа орж гарсан юм билээ. Өөрөөсөө болдог юм уу, өрөөлөөс болдог юм уу хэмээн үгээр идэж, Ш.Адьшаа гишүүн ч мөчөөгөө өгөхгүй “Энхбаяр аа, чи ганцаараа хууль мэддэг юм биш. Залуу хүний хувьд ийм онгиргон сагсуу байж болохгүй. Ах хүний хувьд хэлье. Хол явахгүй шүү” хэмээн хэгжүүрхэнэ.

Хууль зүйн байнгын хороогоор Шүүхийн тухай хуулийн шинэчилсэн найруулгын төслийг өнөөдөр хэлэлцэх явцад энэ байдал мөн л давтагдав. Чуулганы танхимд асуудал хэлэлцэх бүрт мөчөөрхөж суудаг хоёр гишүүний занг бусад гишүүд нь ч харж, залхжээ. Ямар сайндаа л Д.Ганбат гишүүн нэг намын нөхрөө өмөөрч “ Энхбаяраа чи үг хэлэх, ам ангайх болгондоо Ш.Адьшаа гишүүнийг яагаад рецедив гэмт хэрэгтнээр нь байнга дуудаж байдаг юм бэ. Хонгилоор чирэгдлээ, чирлээ л гэх юм. Тэгж яривал чи өөрөө ч нэр цэвэр хүн биш шүү” хэмээн омогдоод авсан. Аль ч парламентад ах, захаа үл хайхран нэг нэгэнтэйгээ байнга сөргөлддөг гишүүд байдаг.

Энэ удаагийн парламентын толхилцсон хоёр нь гишүүн Б.Энхбаяр, Ш.Адьшаа нар бололтой. Тэдний хэрүүл маргаан өдгөө чуулганы танхимаас хальж, хүн бүрийн ярианы сэдэв болж эхэллээ.

У.Тэргэл