УИХ-ын сонгуулийн дараа АН-ын дарга ёс зүйн хариуцлага хүлээж буйгаа мэдэгдээд намын тамгаа УИХ-ын гишүүнээр сонгогдоод байсан дэд дарга Ц.Туваанд шилжүүлж, үүрэг гүйцэтгэгчээр томилсон.

Харин өнгөрсөн сард болсон АН-ын X Их хурлын дараа тамгаа шилжүүлээд байсан С.Эрдэнэ Ц.Тувааныг намын даргын үүрэг гүйцэтгэх эрхгүй хэмээн зарлаж, намын тамгаа хүчингүй гэж байсан юм.

Улсын бүртгэлийн ерөнхий газрын лавлагаагаар АН-ын дарга С.Эрдэнэ гэдгийг оны өмнөхөн зарласан. “Зургаан сар намын дотоод ажилд оролцохгүй ажиглалаа, манай нам эзэнгүй айл шиг байгаа учир эргэн ирлээ” хэмээн мэдэгдсэн С.Эрдэнэ дарга өнгөрсөн сарын 31-нд Улсын Дээд Шүүхэд хандан тайлбар шаарджээ.

2020 оны Арваннэгдүгээр сарын 5-нд АН-ын ерөнхий нарийн бичгийн дарга П.Нүрзэдийн албан бичгийн дагуу Улсын Дээд Шүүх цахим бүртгэлдээ Ц.Тувааныг АН-ын даргын үүрэг гүйцэтгэгч гэж оруулсантай холбоотойгоор ийн тайлбар шаардсан аж.

Түүний үзэж байгаагаар аль нэгэн намын ямар нэгэн албан тушаалтан хүсэлт өгөөд л Дээд Шүүхийн цахим бүртгэлд ингэж өөрчлөлт оруулж байгаа нь Эрүүгийн гэмт хэргийн үндэслэлтэй үйлдэл. Иймээс уг үйлдэлдээ тайлбар хийхийг Улсын Дээд Шүүхийн Иргэний танхимын тэргүүн Х.Сонинбаярт хандсан албан бичгээрээ шаардсан байна.

С.Сүлд