Сүүлийн үед хуулийн салбарт олон шинэчлэл хийн, ялангуяа 30 жил “гар хүрээгүй” Шүүхийн тухай хуулийг шинэчлэн найруулж, Авлигын эсрэг хуульд нэмэлт өөрчлөлт оруулж, Эрүүгийн хуулийн шинэ зүйл заалт буюу Зорчих эрхийг хязгаарлах  ялыг хэрэгжүүлж эхэлсэн гээд “өгөөжтэй” он жилүүд байлаа.  Үүнтэй зэрэгцэн цагдаа, прокурор,шүүгч зэрэг хуулийн ажилтнуудтай холбоотой хэргийг мөрдөн шалгах чиг үүрэгтэй УЕП-ын дэргэдэх Мөрдөн байцаах албыг эргэн сэргээх тухайд гишүүд санал нэгдэж, харин энэ дунд анхаарал татсан нэг ноцтой асуудал нь Авлигатай тэмцэх газрын чиг үүргийг өөрчилж, бүтэц, зохион байгууулалтыг эргэн  харах тухай хөндсөн явдал байлаа.

Хууль зүй, дотоод хэргийн сайд Х.Нямбаатар “Авлигатай тэмцэх газрын гол чиг үүрэг бол соёл гэгээрүүлэх, урьдчилан сэргийлэх ажил юм. Тиймээс энэ чиглэл рүү нь түлхүү ажиллуулна гэж байв. Мөн тэрбээр  хуулийн байгууллагуудын ажил үүргийн хуваарь  давцхдаг. Тодруулбал, Авлигатай тэмцэх газар гүйцэтгэх болоод мөрдөн шалгах ажиллагааг явуулдаг. Тагнуул, Эрүүгийн цагдаа, Мөрдөн байцаах алба гээд бүгд явуулдаг. Тиймээс зөрчил үүсч эхэлдэг. Танайх, манайх шалгана, шалгахгүй хэмээн сөргөлдөх нь их. Тиймээс энэ олон давхцлыг үгүй хийх үүднээс тус тусынх нь эрх үүргийг ялгаж, салгаж өгөх хэрэгтэй” гэж байв.

Гишүүд ч Авлигатай тэмцэх газар шүдгүй арслан болсон гэж байв. Учир нь, ихээхэн хүч хөдөлмөр зарж илрүүлсэн,  мөрдөн шалгасан  хэргүүдийнх ердөө хэдхэн хувийг шүүх шийдэн, зохих ял шийтгэлийг оноодог байна. Эндээс харахад, АТГ муу ажиллаж байна, эсвэл шүүхэд ашиг сонирхол байна гэж харагдаж байгаа юм.

Тиймдээ  ч төрийн ордонд Авлигатай тэмцэх газрын гүйцэтгэх ажиллагаа явуулах, мөрдөн шалгах гол чиг үүргийг “авч”, зөвхөн иргэдийг соён гэгээрүүлэх, авлигаас урьдчилан сэргийлэх чиглэлийг хэвээр үлдээж, мөн хөрөнгө орлого, ашиг сонирхлын мэдүүлэг авдаг байхаар зохицуулалт хийхээр ярилцаад эхэлжээ.

Гол “амин зүрх” болсон гүйцэтгэх ажиллагаа явуулах, мөрдөн шалгах чиг үүргийг нь авчихаар Авлигатай тэмцэх газар жинхнээсээ шүдгүй арслан болно гэсэн үг юм.

Төрийн ордонд мөн АТГ-ыг татан буулгах, ер нь гол эрх үүргийг нь хумьчихаж байгаа болохоор бие даасан газар бус агентлаг ч байж болох юм гэсэн яриа хөвөрч, гишүүдийг лоббидоод эхэлжээ. Харин хэний том эрх ашиг энд яваад байна вэ. Удахгүй ил болох биз ээ.

У.Тэргэл