Шударга өрсөлдөөн хэрэглэгчийн төлөө газрын дарга Б.Бат-Эрдэнэтэй ярилцлаа.

-Хөл хорио тогтоосноос хойш өргөн хэрэглээний бараа бүтээгдэхүүний үнэ өдрөөс өдөрт өсч байна. Тодруулбал, худалдааны төв, хүнсний дэлгүүрийн худалдагчид үгсэн хуйвалдаж үнэ нэмсэн гэх шүүмжлэл явж эхэлсэн. Эл асуудалд танай зүгээс хяналт  шалгалтын ажлыг хэрхэн хийж байна вэ?

-Цаг үеийн нөхцөл байдлаас үүдэж, зах зээлд үгсэн хуйвалдсан зүйл одоогоор тогтоогдоогүй. Манай байгууллагын хувьд стратегийн хүнсний үнийн асуудалд хяналт тавьж байгаа. Бусад бараа бүтээгдэхүүн зах зээлийн зарчмаар тодорхойлдог.

-Жишээ нь 300-350 төгрөгөөр зарагдаж байсан өндөг 500 төгрөгт хүрч байна. Энэмэтчилэн үнийн хөөрөгдөл их гарч байна. Нөгөөтэйгүүр зохиомол хомсдол үүсгээд байх шиг?

-Өндөг бол улирлын чанартай үнэ хэлбэлздэг бүтээгдэхүүн. Дотоодын нийлүүлэгчид 45, импортоор 55 хувийг хангадаг. Засгийн газрын шийдвэрээр хилийн боомтуудын үйл ажиллагааг хаасан, тодорхой хязгаарлалт тогтоосонтой холбогдуулан импортын өндөгний тоо хэмжээ буурсан. Дотоодын буюу С0, С1 гэсэн задгай өндгийн нийлүүлэлтэд аж ахуйн нэгжүүд үнийн бодлого барина гэдгээ өөрсдөө хэлсэн. Зах зээлд 340 төгрөгөөр нийлүүлж 400 хүртэлх төгрөгөөр зарж байгаа. Савлагаатай, арчилгааны, сувиллын, баяжуулсан зэрэг өндгийг зах зээлийн зарчмаар үнийг тогтоож худалдаалж байна. ОХУ-аас орж ирж байгаа өндөгний хувьд Монгол Улсад 401 төгрөгөөр орж ирж, 450-500 төгрөг хүртэлх үнээр худалдаалж байна.

-Төрөөс цахилгааны суурь үнийг хариуцах шийдвэр гаргасан. Гэтэл  цахилгааны төлбөр хоёр дахин өссөн үзүүлэлттэй гарч байгаа нь иргэдийн дургүйцлийг хүргэх шалтгаан болж байна. Үүнд хяналт шалгалтын ажлыг хийж байгаа юу?

-Эрчим хүчний зохицуулах хороотой хамтран УБЦТС компанид хяналт шалгалтын ажлыг өчигдрөөс эхлүүллээ. Иргэдээс ирсэн гомдолын дагуу хаягыг авч гэрт нь очиж, газар дээр нь хяналт шалгалтыг хийж байна.

-Иргэдээс ихэвчлэн ямар төрлийн санал гомдол ирж байна. Түүнийг хэдий хугацаанд хэрхэн шийдвэрлэж байгаа вэ?

-Өнгөрсөн хугацаанд СӨХ-тай холбоотой гомдол байнга ирсэн. Нийт санал, гомдлын 25-30 орчим хувийн эзэлж байна. Тиймээс СӨХ-ны нэгдсэн хяналтын системийг “УБкалл” компанитай хамтран программчлалаар шийдвэрлэж байна. Удахгүй зарлаад явна. Харилцаа холбоо буюу IPTV холбоотой гомдолууд 40 орчим хувийг дангаар эзэлж байна. “Скаймедиа” болон “Юнивижн” компаниудад Харилцаа холбооны зохицуулах хороотой хамтран хяналт шалгалтыг хийсэн. Удахгүй багцийн автомат сунгалтыг цуцлана гэдгээ компаниуд мэдэгдсэн.

-Та ШӨХТГ-ын даргаар ажиллаад  багагүй хугацааг өнгөрүүллээ. Хийж, хэрэгжүүлсэн ажлаасаа дурьдвал?

-Дөрвөн сар орчмын хугацаанд нийтдээ 56 гол ажлыг хийж гүйцэтгэлээ. Тэр бүрийг дурдаад байвал дуусахгүй байх. Ганц хоёр жишээ хэлэхэд байгууллагын хувьд цахимжиж санал гомдол хүлээн авах цахим системүүдийг ажиллагаанд оруулсан. Импортын автомашины мэдээллийг иргэдэд ил тод болгон нээсэн зэрэг олон ажил байна. 

-Цаашдаа хэрэглэгчдийн эрх ашгийг хамгаалах чиглэлээр ямар ажлуудыг шат дараатай хийхээр төлөвлөж байна вэ?

-Хамгийн түрүүнд хууль эрхзүйн орчиноо ойлгомжтой болгох шаардлагатай байна. Тиймээс Фредрих Эбертийн сан, МУИС-ийн Хууль зүйн сургуулийн эрдэмтэн докторууд, Эрх зүй эдийн засгийн хүрээлэнтэй хамтран Хэрэглэгчийн эрхийг хамгаалах тухай хуулийн шинэчилсэн найруулгын төслийн боловсруулж байна. Удахгүй бид барилгын дотоод агаарын орчны мэдээллийг нээнэ гэх мэт олон ажлыг төлөвлөсөн.

С.Ичинхорлоо