УИХ-ын гишүүн асан Ц.Оюунгэрэл Ардчилсан намаас Монгол Улсын Ерөнхийлөгчид нэр дэвших боломж гарвал, нэрээ дэвшүүлэх болно гэдгээ мэдэгдээд байгаа билээ. Харин түүний энэхүү мэдэгдэл олон хүнд цочрол өгч, энэ ч үүндээсээ түүн рүү ирэх дайралт хэдийнэ газар аваад байна. Тодруулбал Ц.Оюунгэрэлийг "Гадаад хүнтэй гэр бүл болсон учир Ерөнхийлөгчид нэр дэвших боломжгүй" хэмээн түүний хувийн асуудлыг ихээр сөхөх болсон.

Тэгвэл тэрбээр энэ бүх доромжлол нь туулсан амьдралынх нь хажууд юу ч биш, сөрөөд л гарах болно гэдгээ мэдэгджээ. Тодруулбал 25 дугаар суваг телевизийн "Ам нээвэл" нэвтрүүлэгт оролцох үеэрээ "Eр нь ханиа алдсан эр хүнийг өрөвддөг мөртөө ханиа алдсан эмэгтэй хүнийг доромжлох гэдэг. Анхны хань минь ( нисгэгч хүн байсан) онгоцны ослоор нас барахад ард нь үлдсэн хүүхдийг нь, ээжийг нь хэлэх хэлэхгүй үгээр аймшигтай доромжлохыг 20 хэдхэн насандаа үзэж л явлаа. Тэрний хажууд одоогийн над руу, Жeф руу дайрч байгаа нь юу ч биш санагдаж байна. Талийгчаас хойш 7 жилийн дараа дахин гэрлэж, хоёр дахь хүүхдээ гаргасан ч удалгүй салсан нь хүний зовлонг ойлгохгүй дайрдаг хүмүүсээс болсон. Ингээд 2 дагавар хүүхэдтэй намайг тоож ханилъя гэсэн монгол залуу гарч ирээгүй удсан учир аяга цайгаа хувааж уух хүн маань Жeф байж таарсан. Яадаг юм, би төгс биш амьдралтай, ийм л хувь заяатай хүн. Хүний зовлонг тохуурхан доромжилдог энэ муухай хандлагыг сөрөх л ёстой юм билээ. Хамгийн гол нь элэг бүтэн, эрүүл саруул байхад бусад дайралтыг даваад л гарна" хэмээсэн байна. 

Харин түүний энэхүү мэдэгдлийг зарим нэгэн хүн цахим сүлжээнд Ц.Оюунгэрэл өрөвдүүлэх тактик боловсруулж байна гэж буй. Тэгвэл инженер Бат нэрээр олонд танигдсан эрхэм "Эгч маань ослоор өнгөрсөн ханиа дурсахдаа нулимс дуслуулж. Үүнийг харсан пропагандонууд өрөвдүүлэх тактикт шилжчихэж гээд эхлэж бх юм. Тэр хүмүүс тийм зовлон өөрсдөө амсах үедээ ухаарах болтугай л гэхээс" хэмээн жиргэжээ.