УИХ-ын гишүүн Н.Наранбаатар Хөдөлмөрийн тухай хуулийн төсөлд уул уурхайн салбарт ажиллагсдын ажиллах хоногийг 14-өөс дээшгүй, амрах хоногийг 14 хоногоос доошгүй байх саналыг ажлын хэсгийн ахлагч Ц.Мөнх-Оргилд хүргүүлжээ.

Тодруулбал, тус салбарт 56600 гаруй хүн ажиллаж байгаагийн 57 хувь нь үндсэн, 43 хувь нь гэрээт болон туслан гүйцэтгэгч компанийн ажилтан байгаа аж.

Тиймээс эдгээр ажилтны хөдөлмөрийн нөхцөл, онцлогийг харгалзан үзэж хуульчлах ёстой гэж үзжээ.

Учир нь жасаагаар ажиллах зохицуулалт нь гэр бүл болон тухайн ажилтны эрүүл мэндтэй шууд холбоотой хөдөлмөрийн харилцаа бөгөөд тухайн ажилтан гэрээсээ алслагдмал газар ажилладаг тул гэр бүл болон үр хүүхдэдээ анхаарал халамж тавих боломжгүйгээс гэр бүлийн салалт ихсэх шалтгаан болж байна. Мөн тухайн ажилтны эрүүл мэндэд сөргөөр нөлөөлж, үйлдвэрлэлийн осолд өртөх эрсдэл өндөр болдог зэрэгт үндэслэн дээрх саналыг боловсруулжээ.

Б.Лхам