2017 оны Эрүүгийн хуулийн нэмэлт, өөрчлөлтөөр хөөн хэлэлцэх хугацаатай холбоотой асуудлаар 800 гаруй гэмт хэрэг хэрэгсэхгүй болж, 1500 гаруй гэмт хэрэгтэн ял завшжээ. Их Хурлын алдаа нөгөөтээгүүр, нөлөө бүхий эрхмүүдийн лоббиноос үүдэж авлига, албан тушалын гэмт хэрэгт холбогдсон этгээдүүд ял завшсан хэрэг.

Улмаар засах оролдлого хийж 2020 оны нэгдүгээр сарын 10-нд Эрүүгийн хуулийн нэмэлт, өөрчлөлтийн Дагаж мөрдөх журмаар зохицуулсан ч эцэстээ Үндсэн хуулийн холбогдох зүйл заалтуудыг зөрчсөн гэсэн Цэцийн дунд суудлын хуралдааны дүгнэлт гараад байна. Хэрэв дээрх хууль унавал тэрбум тэрбумаар нь хулгай хийсэн, авлигачид ял завших боломж дахин тохиох юм.

Энэ талаар УИХ-ын гишүүн Б.Пүрэвдорж “2020 оны нэгдүгээр сарын 10-аас хойш 400 гаруй гэмт хэрэг, түүнд холбогдох 700 гаруй гэмт хэрэгтэн Цэцийн дүгнэлтийг хүлээгээд хуулийн байгууллага дээр байна. Тэд нийт 3.8 их наядын хохирол учруулсан”-ыг өчигдрийн чуулганы хуралдаан дээр онцлон тэмдэглэсэн.

Мөн зарим гишүүд хуульд өөрчлөлт оруулах замаар авлига, албан тушаалын гэмт хэрэгтнүүд ял завшдаг жишиг тогтож байна. Тиймээс Эрүүгийн хуульд өөрчлөлт оруулах замаар энэ боломжийг хаах хэрэгтэйг хэлж байсан юм.

Энэ утгаар Цэцийн дунд суудлын хуралдаанаас гарсан 12 дугаар дүгнэлтийг гишүүдийн олонхийн саналаар хүлээн авах болмжгүй гэж үзэн буцаасан. Гэвч Цэцийн Их суудлын хуралдаанаас дунд шатныхаа гаргасан дүгнэлтийг баталгаажуулбал гол асуудал үүснэ. Б.Пүрэвдорж гишүүний дурдсанаар улсад 3.8 их наядын хохирол учруулсан авлигачид ял завшина гэсэн үг. Гишүүд Цэцийн дүгнэлтийг хүлээн авах боломжгүй гэж буцаасан ч анхнаасаа алдаатай хуулийн өөрчлөлт оруулсан, засах гэж оролдохдоо нуухыг нь авах гээд нүдийг нь сохолсон нь үнэнд гүйцэгдэх нь цаг хугацааны л асуудал боллоо.

Эцэст нь МАН чи, би гэж буруутаны эрэлд гарч, авлигачид нь ялаа завшдагаараа завшаад л дуусах нь.

Б.Лхам