АМЕРИКТ БОЛСОН ЯВДАЛ

Хоёр хоногийн өмнө АНУ-ын Конгрессын хоёр танхим Ерөнхийлөгчийн сонгуулийн дүнг батлахаар хуралдах үеэр Дональд Трампыг дэмжигчид эмх замбараагүй байдал үүсгэж, Капитолын ордныг эзэлсэн. Энэ үеэр цагдаа нар, жагсагчид мөргөлдөж, үүндээ галт зэвсэг  ашиглажээ. Нэг хүн амь үрэгдэж, олон тооны хүн баривчлагдсан талаар олон улсын мэдээллийн агентлагууд мэдээллээ.

Үүний дараа дэлхийн олон улс орны тэргүүнүүд харамсал илэрхийлж, зарим нэг нь Дональд Трампыг “Хүчирхийлэлд уриалсан” гэж буруутгасан. Учир нь, Дональд Трамп дээрх чуулганыг эхлэхээс өмнө хийсэн мэдэгдэлдээ “Одоо бол хүлцэнгүй байх цаг биш” гэжээ.

Үйл явдлын дараа Жо Байден, Дональд Трамп нар ээлжлэн мэдэгдэл гаргасан. Тэгэхдээ Дональд Трамп “Та нарын уур хилэнг би ойлгож байна. Яагаад ингэснийг бүгд, Ялангуяа нөгөө талынхан мэдэж байгаа” гэсэн байна. Мөн уг үйл явдалтай холбогдуулан Twitter, Facebook  компаниуд Дональд Трампын албан ёсны хаягуудыг түр хугацаагаар хаасан юм.

Эцсийн бүлэгт АНУ-д болсон үйл явдал Үндсэн хууль ялж, Дональд Трамп “бууж өгснөөр” өндөрлөж байна. Гэхдээ хүний амь нас эрсэдсэн нь маш харамсалтай юм.

МОНГОЛД ЮУ БОЛОХ ВЭ

Монгол Улсын Ерөнхийлөгчийн сонгууль энэ зун болно. Ердөө таван сар гаруйхны дараа гэсэн үг. Энэ сонгуульд өмнө нь Ерөнхийлөгчөөр ажиллаж байсан эрхмүүд нэр дэвших эрхгүй. Ийм зүйл заалт бүхий Үндсэн хуулийн өөрчлөлтийг 2019 оны  арваннэгдүгээр сард баталсан. Өөрөөр хэлбэл, Ерөнхийлөгч Х.Баттулга дахин нэр дэвшиж болохгүй. Гэхдээ өөрөө гаргалгаа олж, Үндсэн хуулийн цэцээр дүгнэлт гаргуулах замаар дахин нэр дэвшиж болох юм. Ийм асуудлууд яригдаж буй ажээ.

Харин Ерөнхийлөгч Х.Баттулга дахин нэр дэвшихгүй бол юу болох вэ. Энэ асуултад бүрэн дүүрэн бус ч хариулт өгч мэдэх, бас ирэх саруудад ямар үйл явдал өрнөхийг хэлж тааж болохуйц нэгэн мэдээлэл интернет орчинд цацагдлаа.

Ерөнхийлөгч Х.Баттулгын талаас байж болох “Баттулга Ерөнхийлөгчийн барбарос төлөвлөгөө”  гээч нэгэн схем фейсбүүкийн пэйж хуудаст нийтлэгдсэн байна.Уг схем буюу төлөвлөгөөнд дурдсаныг сийрүүлбэл, “2021 оны Ерөнхийлөгчийн сонгуульд хоёр том даваа байна” гэж үзжээ.

Нэгдүгээрт Үндсэн Хуулийн Цэц:

-“Цэц дээр унавал У.Хүрэлсүх Засгийн газартай барьцах. 2020.5.20” гэжээ. Үндсэн хуулийн өөрчлөлт өнгөрсөн оны тавдугаар сарын 20-ноос хэрэгжиж эхэлсэн. “Барьцах” гэдэг нь Үндсэн хуулийн өөрчлөлтөөр Засгийн газрын дөрвөөс илүүгүй сайд давхар дээлтэй байхаар заасан. Гэтэл 2020 оны сонгууль болтол У.Хүрэлсүхийн Засгийн газар бараг тэр чигтээ давхар дээлтэй сайд нартай явсан.

Хоёрдугаарт, АН-аас нэр дэвших:

-“Ц.Элбэгдорж нам дотроо өрсөлдөх учраас АН-ын дүрмийг өөрчлөх замаар өрсөлдөгчгүй нэр дэвших” гэжээ. Үүний хүрээнд 2020 оны нэгдүгээр сарын 6-нд Дээд шүүх дээр С.Эрдэнийн тамгыг гацаах” гэж бичсэн байна. Энэ хэрэгжиж байгаа гэхэд болно.

Түүнчлэн үзэл суртлын зорилгоор, оффшорын мөнгө оруулж ирж мөрийн хөтөлбөрөө биелүүлсэн гэх. Үйлдвэрчний эвлэлийг авах”  гэж бичсэн байна.

АН ДАХЬ ШИНЭ ФРАКЦЫН “МЭДЭГДЭЛ”

Харин Ерөнхийлөгч Х.Баттулгыг нэр дэвшүүлэх ёстой АН дотроос түүнийг эсэргүүцэгчид нэмэгдсээр байна. Тухайлбал, хэдхэн хоногийн өмнө  АН-ын дотоод “вайбэр чаат”-д тус намын УТЗ-ийн гишүүн, ҮБХ-ны гишүүн Чимэдийн Энхтайван маш ноцтойгоор байр сууриа илэрхийлсэн байна.

Тэрбээр “Ганбаяр аа, Чиний бичдэг олон зүйлтэй санал нийлдэг боловч МАНАН мафи, 49 хувийг хамгаалаад байгаа болон бас Монгол Улсыг болон өөрийгөө хэнд ч худалдахад бэлэн хүнийг Ерөнхийлөгчид дэвшүүлэх гэж дэмжээд байгааг огт ойлгохгүй байна. МАНАН мафи нь Монгол Улсын аль өнгөтэй, өнгөтэй өмч хөрөнгө, орд уурхайнуудыг луйвардаж, олон хувь хүн, дотоод гадаадын компаниудын эздийг хэлмэгдүүлэн шоронд хорьж, өмч хөрөнгө, орд уурхайнуудыг дээрэмдэж, гадаадын хөрөнгө оруулалтыг үргээж, Монгол Улсын төр засгийг самарч, ард түмний амьдралыг ядууруулж, өнөөдрийн бослого тэмцэл хийхэд бэлэн болгож байгаа гол буруутан нь гэдгийг мэдэж баймаар юм даа. Дараа нь Женко самарлаа.

Үр дүнд нь ард түмний олонхи нь сүүлийн 30 жилийн завхралын гол буруутнаар АН-ыг буруутгаж байна. Гэтэл МАНАН мафийн АН-ын талынхан нь зохион байгуулалттайгаар 2016 оны УИХ-ын сонгуульд АН-ыг ялагдуулсан. МАНАН, Женко хоёр 2020 онд АН-ыг дахин ялагдуулахад тусаллаа. Өнөөдөр ч манай АН дотор МАНАН, Женко-гийн хүмүүс амь бөхтэй байна. Эд нараас салахгүйгээр бид хайран цаг хугацаа, амьдралаа хий дэмий үрэн таран хийнэ шүү. Эд нарт олон удаа ашиглуулаад АН-ын нэр хүнд ямар байдалд орсныг та нар харж байгаа биз дээ. Тэд эрх мэдэл, албан тушаалд тансаглаж, хууль бусаар хагартлаа баяжсан боловч цадаж ханахгүй, дахин шуналдаа АН-ыг ашиглахаар зууралдсаар байна. Дахин нэг ашиглуулахад АН-ыг Монголын ард түмэн хүлээж авахгүй болох байх шүү. Олон арван мянган гишүүд дэмжигчид маань олон арван жил итгэл үнэмшилдээ үнэнч зүтгэсний хүчинд АН өдий хүрсэн. Эдүгээ олон гишүүд дэмжигч бурхан болж, үлдсэн нь итгэл үнэмшлээ алдаж, ядуурч, тамир тэнхээгүй болж, гутарч, олон мянган гишүүд дэмжигчдээ бид алджээ. Иймээс АН-аа дахин хүчирхэгжүүлье, гишүүдээ сэргэж, тэдний итгэлийг дахин олж, сонгуульд ялж улс орноо хөгжүүлье гэвэл МАНАН, Женко нарын бүлэглэлүүд болон АН-ыг ашиглан албан тушаалаа буруугаар ашиглаж, идэж ууж, улс орон ард түмнээ хохироосон бүх вируснүүдээс салахгүйгээр бид улс төр хийнэ гэж хайран сайхан цаг хугацаа, хүч хөдөлмөр, хөрөнгө мөнгөө зараад хохь нь л болно шүү.

АН-ын УТЗ-ийн хурал дээр Үндсэн хуулийн өөрчлөлтийн асуудлаар ярилцах үед би "Н.Энхбаяр Ерөнхийлагч анх хууль шүүхийн удирдлагууд томилдог эрх мэдлээ ашиглаж дарангуйлагч болсон. Ц.Элбэгдорж тэр технологийг бүр хөгжүүлж аймшгийн дарангуйлагч болсон. Х.Баттулга одоо тэр технологийг бүр хөгжүүлж насаараа хаан болохоор шунаж байна. Тиймээс Үндсэн хуулийн өөрчлөлтөөр Ерөнхийлөгчийн хууль шүүхэд нөлөөлөх эрх мэдлийг хязгаарлах хэрэгтэй " талаар саналаа хэлж АН-ын ҮХШ-ийн Ажлын хэсэг байгуулж идэвхтэй оролцох талаар санал гаргахад Дэлгэрмаа гишүүн дэмжиж Ажлын хэсэг байгуулсан. Дараа нь С.Эрдэнэтэй уулзаж удаа дараа сануулсаар байтал С.Эрдэнэ Женкогоос айгаад Ажлын хэсгийг олигтой хөдөлгөөгүйгээс Үндсэн хуулийн өөрчлөлтөөр дорвитой өөрчлөлт хийж чадаагүй. Тухайн үед АН-ын бүлэг идэвхтэй ажилласан бол тэр үеийн МАН-ын бүлгийн шударга гишүүдтэй хүч хавсарч Үндсэн хуулийн өөрчлөлтийг нилээд сайн хийж болох байсан.Тэр үед Женкогийн эсрэг дуугарч шүүмжилдэг хүн байсныг би санахгүй байна. Одоо Үндсэн хуулийн өөрчлөлтөөр Женког шүдгүй арслан болгож байгаа тул зориг орсон зарим нөхөр Ерөнхийлөгчийн сонгуульд нэр дэвшихээр горилж, аймшиггүй их зориг гаргаж хэвлэл мэдээллээр ярилцлага өгч попорч байгаа юм байна . Ийм хүмүүсээс болгоомжлох хэрэгтэй. Манай АН-аас Ерөнхийлөгчид нэр дэвшиж Монгол Улсын Ерөнхийлөгчийн ажлыг нэр хүндтэй хийж чадах өндөр боловсролтой, ёс зүйтэй, шударга гишүүд олон бий. АН-аас дахиж ёс зүйгүй ,авилгач, хулгайч, дээрэмчин, улс орон ард түмнээсээ урвагч, өөрийгөө болон үр хүүхэд, эх орноо худалдахаас буцахгүй гэдгээ харуулсан адгийн хүмүүсийг дараа дараагийн сонгуулиуд, албан тушаалд нэр дэвшүүлж болохгүй гэдэгтэй Эрхэм журмын нөхөд та бүхэн санал нийлнэ гэж бодож байна” гэжээ.

Эх сурвалжийн мэдээллээр яг энэ байр суурь дээр нэгдсэн АН-ынхан нийлж шинэ фракц үүсгэж байгаа юм байна. Тун удахгүй фракцаа зарлаж үйл ажиллагаагаа идэвхжүүлэх ажээ.

Удахгүй болох Ерөнхийлөгчийн сонгуулийн өмнө иймэрхүү үйл явдлууд маш хурцаар өрнөж байна. Маш товчоор хэлэхэд манай Ерөнхийлөгч Үндсэн хуультайгаа үзэж байна уу гэж харагдаж буй. Тэгэхээр эндээс “АНУ-д Үндсэн хууль Трампыгаа яллаа, манайх Х.Баттулгыгаа дийлэх үү” гэдэг том асуудал үүсч байх шиг байна.

С.Сүлд