Монгол Улсын Ерөнхийлөгч Х.Баттулга оффшор бүсээс орж ирэх мөнгөнөөс өрх бүрд нэг сая төгрөгийн дэмжлэг үзүүлэх хуулийн төсөл өргөн барьсан билээ. Сангийн сайд Ч.Хүрэлбаатар энэ талаар “Оффшор бүсээс Төрийн санд ямар ч мөнгө орж ирээгүй. Орж ирсэн ч тухайн  хүний хөрөнгө мөн эсэх, мөн бусдын хөрөнгийн өмчлөлийг зөвхөн шүүх шийднэ” хэмээн мэдээлсэн.

Харин Монгол Улсын Ерөнхийлөгч Х.Баттулга өнөөдөр энэ асуудлаар МҮОНТ-д ярилцлага  өгнө хэмээн сүржин зар явж, нийтэд хүлээлт үүсгээд байв. Гэвч Ерөнхийлөгч Х.Баттулга өмнөх хийсэн, ярьснаа л давтсанаас бус  оффшороос төдөн төгрөг орж ирсэн гэх тоо баримт ганцыг ч хэлсэнгүй. Шийдэл ярьсангүй. Өнөөдрийн ярилцлагаас ганц л юм тодорхой боллоо.

Сангийн сайдын хэлсэнчлэн, оффшор бүсээс нэг ч төгрөг орж ирээгүй юм байна. Энэ зөвхөн Ерөнхийлөгчийн сонгууль угтсан Х.Баттулгын пиар гэдэг нь илчлэгдэв.

Цонхны цаанаас чихэр долоолгож сурсан Ерөнхийлөгч Х.Баттулга энэ удаад ч нийгэмд хүлээлт үүсгээд байсан асуудалд барим тавим тайлбар хийж, ард түмнээр доог тохуу хийлээ. Ер нь Ерөнхийлөгчийн яриад байгаа шиг оффшороос мөнгө орж ирэх нь худлаа юм байна. Сонгууль угтсан шоу, хэлбэрдэлт юм байна гэдгийг бултаараа харлаа, сонслоо.

У.Тэргэл