Монгол Улсын Ерөнхийлөгч өрх бүрд нэг сая төгрөгийн ваучер өгч, үүний 800 мянгад нь үндэсний үйлдвэрлэлийнхээ бараа бүтээгдэхүүнээс худалдан авалт хийх, үлдсэн 200 мянган төгрөгийг нь бэлнээр өгөх  гэж зүтгүүлсээр, эцэст нь оффшороос орж ирэх мөнгөнөөс өгөх тогтоолын төслийг УИХ-ын даргад өргөн барьсан билээ.

Цар тахлын үед иргэдэд хүлээлт үүсгэсэн энэхүү явдал эцэстээ шоу, пиар байсныг Ерөнхийлөгчийн телевизэд өгсөн ярилцлага баталсан. Гэсэн ч Ерөнхийлөгч маань сонгууль угтсан энэхүү амлалтаа биелүүлэхээр улайрч, мөнгө хэвлэж тараах бас нэгэн хувилбар гарган, төр, засгийг шахаад эхэлсэн бололтой.

Нэг үгээр бол, түүний ярилцлагаас эхний удаад мөнгө хэвлээд тараачих. Оффшороос мөнгө орж ирэнгүүт буцаагаад өгчихье гэсэн  утга илэрхийлж байна. Үүнийг нь батлах мэт Сангийн сайд Ч.Хүрэлбаатар “ Зөвхөн төрийн сан төдийгүй Монголд оффшорын  гэгдэх мөнгө огтхон орж ирээгүй гэдгээ Ерөнхийлөгч ТВ-ээр ярилцлага өгөхдөө батлаад хэлчихлээ. Харин “оффшорын мөнгө” нэрээр Монголбанкаар мөнгө хэвлүүлж,тараалгавал төгрөгийн ханш 2012-2016 онд хоёр дахин унасан түүх давтагдана. Цалин тэтгэврийнх нь худалдан авах чадвар хоёр дахин унасан гашуун туршлагаа монголчууд мартаагүй, мартах ч үгүй. Байхгүй мөнгийг тараана гэж юу байдаг юм бэ?” хэмээн жиргэжээ. 

У.Тэргэл