Нийгмийн бодлогын байнгын хороогоор Хөдөлмөрийн тухай хуулийн шинэчилсэн найруулгын төслийг өнөөдөр хэлэлцэж байна. 1999  оноос Хөдөлмөрийн тухай хуульд нэмэлт өөрчлөлт огт оруулаагүй бөгөөд энэ удаад ихээхэн дэвшил гарахаар зүйл, заалт оруулж байгаа аж.

Тухайлбал, байгууллагын дотоодын нууцтай холбоотой ажлыг хариуцдаг албан тушаалтан ажлаасаа гарах тохиолдолд нэг жилийн хугацаанд цалингийн нь 50 хувийг олгож байхаар тусгажээ.

Энэ талаар Ц.Мөнх-Оргил “Үүрэн телефоны компанийн маркетингийн албаны дарга нь байгууллагынхаа нууцлалын бүх материалыг өрсөлдөгч компанидаа авч очоод зарчихсан. Өөрөө албан тушаалд томилогдчихсон ийм явдал гарсан. Энэ асуудлыг шийдэх гэхээр Хөдөлмөрийн тухай хуульд ямар ч зохицуулалт байдаггүй.

Тиймээс нууцыг хариуцдаг албан тушаалтан ажлаасаа гарвал адил салбартаа нэг жилийн хугацаанд ажиллахгүй, харин өөр салбарт бол болохоор зохицуулалт хийж байгаа. Хамгийн гол нь жирийн ажилтан биш шүү. Дарга, албан тушаалтан гэж тодорхой зааж өгсөн байгаа. Энэ нь нэг талаар ажилтнаа, нөгөө талаар байгууллагаа хамгаалсан заалт юм” гэлээ.

У.Тэргэл