Монгол Улсын Ерөнхийлөгч Х.Баттулга цар тахлын энэ үед өрх бүрд нэг сая төгрөг өгөх тогтоолын төслийг УИХ-ын даргад өргөн барьсан. Тэрбээр энэ талаараа МҮОНТ-д ярилцлага өгсөн ч тодорхой баримт гаргаж тавьсангүй, шийдэл ярьсангүй, тавилттай жүжиг байлаа.

Мөн ярилцлагаараа оффшорт мөнгө байхгүйг баталчихсан юм. Гэвч Ерөнхийлөгч маань мөчөөгөө өгсөнгүй, хуулийн байгууллагынхныг хөдөлгөөд эхэллээ.

Ярилцлага өгсний маргаашнаас л АТГ-ын Хэвлэл, олон нийттэй харилцах асуудал эрхэлсэн ахлах комиссар Т.Баярхүүгийн нэг жилийн өмнө хэвлэлд өгсөн “95 сая ам доллартай тэнцэх мөнгийг оффшор бүсэд угаагаад, эдийн засагт оруулж ирснийг шалгаж байна”  гарчигтай ярилцлагууд мэдээллийн хэрэгслээр хөвөрч, өчигдөр гэхэд л УЕП-ын орлогч прокурор Ц.Насанбат мэдээлэл хийн, энэ үеэрээ “Оффшор”-ийн гэх хэрэгт 23 хүнийг шалгаж байгаа тухай хэллээ.  

Мэдээлэл өгөхдөө хойрго, элдэв зөвшөөрөл ярьдаг прокурорын байгууллага ч энэ удаад гэнэт ам нээж, дуулиант хэргүүдийн талаарх мэдээллийг дэлгэрэнгүйгээр өгөв.  Энэ бүхнээс харахад Монгол Улсын Ерөнхийлөгч “Унасан бөх ууртай” гэгчээр элдэв шүүмжлэлд өртсөнийхөө дараа ийнхүү оффшортой холбоотой асуудлаар хууль хүчний байгууллагуудыг хөдөлгөж,  элдэв тайлбар хэлүүлэв. Оффшорын гэх хэргийг шалгаж байгаа юм байна, мөнгө байгаа  юм байна гэх ойлголтыг нийтэд төрүүлэхийн тулд Ерөнхийлөгч маань ихээхэн улайрч байна даа.

У.Тэргэл