УИХ-ын гишүүн Б.Пүрэвдорж Зөрчлийн тухай хуулиар шийтгэл хүлээсэн иргэдийн торгуулийг хязгаарлалтайгаар өршөөх тухай хуулийн төсөл өргөн барьснаа 2020 оны арванхоёрдугаар сарын 28-нд мэдээлж байв.

Тэрбээр “2017 оны долоодугаар сарын 1-нээс хэрэгжүүлж эхэлсэн Зөрчлийн тухай хуулиар давхардсан тоогоор дөрвөн сая иргэн, 650 орчим тэрбум төгрөгөөр торгуулсан байдаг. Энэ нь төсвийн цоорхойг нөхөх хүртэлх өндөр торгуулиар иргэдийг хохироосон гэсэн үг. Тэгээд ч цар тахлын  улмаас иргэдийн орлого буурсан энэ үед өршөөлийн хууль нэн шаардлагатай. Хуулийн төслийг баталбал, ойрын хугацаанд шалган шийдвэрлэх ажиллагаанд байгаа нэг сая орчим иргэний зөрчлийг өршөөх юм" гэсэн билээ. Хуулийн төслөөр иргэн, аж ахуйн нэгжийн торгуулийг 10 сая хүртэлх төгрөгөөс доош тохиолдолд чөлөөлөхөөр тусгаснаа ч мөн хэлсэн юм.

Гэвч энэхүү мэдэгдлээс хойш гишүүний бараа, сураг ч алга. Харин эсрэгээрээ түүний энэхүү мэдэгдэл нийгэмд хэдийнэ хүлээлт үүсгээд эхэлчихжээ.

Тэгээд ч Зөрчлийн тухай хуулиар ногдуулдаг торгуулийн  дийлэнх буюу 80 хувь нь замын хөдөлгөөний дүрмийн зөрчил байдаг. Тиймдээ ч улаан гэрлээр гарсан, хурд хэтрүүлсэн, согтуугаар автомашин жолоодсон, жолооны үнэмлэхгүй зэрэг замын хөдөлгөөний дүрэм зөрчсөний улмаас торгуулсан олон зуун жолооч  өнөөдрийг хүртэл торгуулиа төлөхөөс зайлсхийж иржээ. Бусад зөрчилд оноосон торгуулийг ч мөн иргэд төлөхгүй. Тэдний хүлээлт торгуулийг нь тэглэх л болоод байна. Өнөөдрийн байдлаар, 5-10 сая төгрөгийн торгууль төлөх шийтгэлтэй 700 орчим иргэн байгаа бол дийлэнх нь нэг саяас доош төгрөгийн торгуультай юм байна.

Өршөөл, уучлал, чөлөөлөхтэй холбоотой хууль угаасаа  нийгэмд хүлээлт үүсгэдэг. Тиймээс энэ асуудалд ихэд болгоомжтой хандахгүй бол энэ мэтчилэн Зөрчлийн хуулиа хэрэгжүүлэхгүй, торгуулиа төлөхгүй гацаах байдал үргэлжилнэ. Харин Б.Пүрэвдорж гишүүний өргөн барьсан хуулийн төслийг хэзээ хэлэлцээд, хэзээ батлахыг даанч хэлж мэдэхгүй. Харин ойрын хугацаанд биш гэдэг нь л тодорхой байна. 

У.Тэргэл