Ардчилсан нам хоёр "толгой"-той болоод бараг нэг сарын нүүр үзэж байна. 2020 оны шат шатны сонгуульд өвдөг шороодсон Ардчилсан нам Ерөнхийлөгчийн сонгуулийн жилийг хоёр дарга, хоёр тамгатай, шүүхийн хаалга татаж угтсан.

Тэгвэл эрх мэдлийн төлөөх тэдний хүсэлт хангагдсангүй. Тодруулбал, Ц.Туваан "Ардчилсан намын 2020 оны 12 дугаар сарын 18-ны өдрийн 10 дугаар их хурлаар баталсан үндсэн дүрэмд оруулсан нэмэлт өөрчлөлтийг бүртгүүлэх, улсын бүртгэлийн гэрчилгээнд өөрчлөлт оруулах хүсэлт", С.Эрдэнэ "Ардчилсан намын тамга, тэмдгийн хяналтын дугаарыг бүртгүүлэх, цахим бүртгэлд залруулга хийлгэх хүсэлт"-ийг Дээд шүүхэд хүргүүлсэн байдаг. Тэгвэл дээрх асуудлыг өчигдөр Дээд шүүх хэлэлцсэн юм. 

Тус шүүхээс Ц.Туваан, С.Эрдэнэ нарын хүсэлтийг хангахаас татгалзаж, цахим бүртгэлд байсан Ц.Тувааны нэрийг хассан байна. Ингэснээр цахим бүртгэлд тус намыг төлөөлөх эрх бүхий этгээдийн бүртгэл тодорхой бус үлдэж, нам тухайн дотоод асуудлаа шийдвэрлэж, энэ талаар дахин хандах эрхтэй болов. Мөн тамга тэмдгийн асуудлыг эрх бүхий байгууллагад хандаж шийдвэрлүүлэх нь зүйтэй гэж үзсэн байна.

Ингэхээр Ардчилсан намын даргын төлөөх тэмцэл дахин үргэлжилнэ гэсэн үг. Гэтэл Ерөнхийлөгчийн сонгууль хаяанд ирж, өрсөлдөгч намууд хэдийнэ бууриа засаад эхэлчихсэн. Ийм атал 30 жилийн түүхтэй, мянга мянган гишүүд дэмжигчтэй Ардчилсан нам сандал суудлын төлөө тэмцэлдсээр суух нь.

Харин Ардчилсан намын тамга хийгээд Үндсэн дүрэмд өөрчлөлт оруулах С.Туваан, С.Эрдэнэ нарын дараагийн нүүдэл юу байх бол.

Б.Баатар