УИХ-ын өнгөрсөн сонгуулийн үр дүнгээр МАН 62 суудал авч үнэмлэхүй олонх болсон. Олон байхын зовлонг өнгөрсөн дөрвөн жилд ханатлаа амссан МАН-ынхан энэ удаа ч мөн дэндүү олуулаа сонгогдсон. Нэг намаас сонгогдсон гишүүд бусдаасаа ялгарахын тулд эхнээсээ лобби бүлэг байгуулж, бас бүлэрхэж эхэлсэн нь нууц биш. МАН-ын намын бүлгийн доторх бичил бүлгүүдийн нэг нь анх удаа УИХ-ын гишүүнээр сонгогдсон Г.Амартүвшин, Х.Ганхуяг, Г.Дамдинням нар байлаа. Тэдний нөхөрлөл гэхдээ УИХ-д ороод ч үүссэн юм биш, Г.Амартүвшин гишүүнийг Хөгжлийн банкны ерөнхий захирлаар ажиллаж байх үеэс эхэлсэн гэдгийг илчлэх баримт бидэнд олдлоо. Тэдний нөхөрлөл үзэл санаагаа нэгтгэх лобби бүлгээс хальж түрийвчээрээ нэгдсэн байж магадгүйг энэ баримт илчлэнэ.

УИХ-ын гишүүн Г.Амартүвшин 2019 оны тавдугаар сард Хөгжлийн банкны захирлаар томилогдож байсан. УИХ-ын ээлжит сонгууль болохоос яг нэг жилийн өмнө сүр дуулиантайгаар томилогдсон тэрбээр сонгуулийн жил эхлэхийн өмнөхөн ажлаа чимээгүйхэн өгсөн.

Ердөө л зургаан сар Хөгжлийн банкийг удирдсан гэсэн үг юм. Гэсэн ч түүнийг захирлаар нь ажилласан энэ зургаан сарын хугацаанд Хөгжлийн банк 327 тэрбум төгрөгийн зээл олгосон байна.

Хамгийн хачирхалтай нь энэ зээлээс авсан томоохон зээлдэгчдийн хэд хэд нь МАН-аас сонгуульд өрсөлдөн УИХ-ын гишүүнээр сонгогдсон болон МАН-ын гишүүнчлэлтэй, удирдах албыг хашилцаж явсан хүмүүсийн үр хүүхэд, ах дүүс байгаа юм. Г.Амартүвшин гишүүнийг Хөгжлийн банкны Ерөнхий захирлаар ажиллаж байх хугацаанд зээл авсан таван том зээлдэгчийг танилцуулъя.

1.

Зээлдэгч: - “Мак цемент” ХХК

Шийдвэр: – Зээлийн нөхцөлийг өөрчлөн дахин санхүүжилт өгөх шийдвэр гаргасан.

Үндсэн зээлийн үлдэгдэл: - 197.621.651.268.27

Үйл ажиллагаа: - Цемент үйлдвэрлэл

Гол хувьцаа эзэмшигч: - МАК

2.

Зээлдэгч: - “Эм эм и кью” ХХК

Шийдвэр: – Шинээр зээл олгосон

Үндсэн зээлийн үлдэгдэл: - 67.779.051.083.00

Үйл ажиллагаа: - Уул уурхай, олборлолт

Гол хувьцаа эзэмшигч: - “Моннис интернэйшнл” ХХК

3.

Зээлдэгч: - “Вертекс майнинг партнер” ХХК

Шийдвэр: – Шинээр зээл олгосон

Үндсэн зээлийн үлдэгдэл: - 33.000.000.000.00

Үйл ажиллагаа: - Уул уурхай, олборлолт

Гол хувьцаа эзэмшигч: - “Глобал майнинг сервис” ХХК, Г.Дамдинням

4.

Зээлдэгч: - “Изинис эйрвэйз” ХХК

Шийдвэр: – Шинээр зээл олгосон

Үндсэн зээлийн үлдэгдэл: - 22.915.000.000.00

Үйл ажиллагаа: - Агаарын тээвэр

Гол хувьцаа эзэмшигч: - Т.Эрдэнэ, Н.Ганбаатар, Ч.Бямбадорж, Э.Золзаяа

5.

Зээлдэгч: - “Шанх майнинг” ХХК

Шийдвэр: – Шинээр зээл олгосон

Үндсэн зээлийн үлдэгдэл: - 5.600.000.000.00

Үйл ажиллагаа: - Барилга, авто зогсоол

Гол хувьцаа эзэмшигч: - Ш.Билигтэй /Гандирс ХХК/

Эдгээрээс анхаарал татаж байгаа нь 33 тэрбум төгрөгийн зээл авсан “Вертекс майнинг сервис” ХХК болон 67 турбумын зээл авсан “Моннис интернэйшнл”. “Моннис интернэйшнэл”-ийн авсан зээлийн талаар дараагийн нийтлэлээрээ хөндөх учраас энэ удаа орхиод 33 тэрбумын зээл авсан “Вертекс майнинг сервис” ХХК-ийн талаар дурдъя.

Харин 33 тэрбумын зээл авсан энэхүү компанийн хувьцаа эзэмшигч нь УИХ-ын гишүүн Г.Дамдинням бөгөөд 2018 онд бүртгэгдсэн байна.

Тодруулбал, “Вертекс майнинг сервис” ХХК нь гурван хувь эзэмшигчтэй, тэр нь УИХ-ын гишүүн Г.Дамдинням, Хөгжлийн банкнаас 33 тэрбумын зээл авсан “Глобал майнинг сервис” ХХК, “Дэлхийгээр аялагчид” группийн үүсгэн байгуулагч, аялагч Ө.Батбаяр нар юм.  http://opendata.burtgel.gov.mn/lesinfo/6231683 энэ хуудаснаас бас нэгэн сонирхолтой мэдээлэл гарч ирж байгаа нь “Вертекс майнинг партнер” компанийн Гүйцэтгэх захирлаар Хассуурийн Хашчимэг ажилладаг ажээ.

Хассуурийн Хашчимэг бол УИХ-ын гишүүн Х.Ганхуягийн төрсөн дүү.  Х.Ганхуяг нь “Хэра инженеринг”-ийн 50 хувийг эзэмшдэг бол түүний охин компани “Хэра инвенстмент”-ийн 10 хувийг УИХ-ын гишүүн Г.Дамдинням эзэмшдэг.  

Ийм эрх ашгаар нэгдсэн Г.Амартүвшин, Г.Дамдинням, Х.Ганхуяг нар хэдхэн хоногийн өмнө Бизнесийн зээлийн хүүг 50 хувь бууруулах тогтоолын төслийг санаачлан УИХ-ын даргад өргөн бариад байгаа билээ.

С.Сүлд