Ардчилсан намын даргын асуудал олны анхаарлыг татсан хэвээр байна. Монгол Улсын Ерөнхийлөгчийн сонгуулийн жил учир намын дарга хэн болохоос тус сонгуулийн хувь заяа шийдэгдэх учиртай гэдгийг улстөрчид хэлж буй. Мөн эрх ашгийн маш том асуудал хөндөгдөж байгаа гэдгийг ч хэлэх хүн олон байна. Тиймээс ч өнөөдөр Ардчилсан нам хоёр тамга, хоёр намын дарга гэх хүнтэй болоод байгаа юм. 

Тэгвэл Ардчилсан намын даргад нэр дэвшигчдийн талаарх бор шувуу нисч эхэллээ. Ардчилсан намын Дотоод сонгуулийн хороонд 11 хүн намын даргад өрсөлдөх хүсэлтээ илэрхийлж, хандаад байгаа аж.

Тодруулбал, Ардчилсан намын ҮБХ-ны гишүүн, хуульч, О.Алтангэрэл, УИХ-ын гишүүн О.Цогтгэрэл, УИХ-ын гишүүн асан Ц.Оюунгэрэл, УИХ-ын гишүүн асан Л.Гантөмөр, МХАҮТ-ын Ерөнхийлөгч О.Амартүвшин, НИТХ-ын төлөөлөгч М.Тулгат, Ардчилсан намын ҮБХ-ны гишүүн О.Чулуунбилэг, , Ардчилсан намын ҮБХ-ны гишүүн Л.Уртнасан, Ардчилсан намын ҮБХ-ны гишүүн А.Цэрэнбат, Ардчилсан намын ҮБХ-ны гишүүн Б.Отгонбат, Ардчилсан намын гишүүн асан Д.Мөнх-Эрдэнэ гэсэн хүмүүс хүсэлтээ хүргүүлсэн гэх.

Эдгээрээс УИХ-ын гишүүн асан Ц.Оюунгэрэл албан ёсоор намын даргад өрсөлдөнө гэдгээ илэрхийлсэн. Харин Д.Мөнх-Эрдэнийг намын гишүүнчлэлээ сэргээгээгүй гэх үндэслэлээр хассан тухай мэдээлэл байна.

Харин эдгээр хүмүүсийг намын даргын сонгуульд нэр дэвшүүлэх, намын даргын сонгуулийг хэзээ явуулах талаарх мэдээлэл одоогоор байхгүй байгаа юм.

Ямартай ч дээрх эрхмүүд намын даргад өрсөлдөхөөр Ардчилсан намын Дотоод сонгуулийн хороонд хүсэлтээ илэрхийлээд байгаа аж.

Б.Баатар