УИХ-ын гишүүн С.Одонтуяа мэдээлэл хийлээ. Тэрбээр “Бид эх орондоо ирмээр байна” суултыг Төрийн ордны хоёр давхарт эхлүүлж байгаагаа мэдэгдэв.

Тэрбээр "Энэ суулт нь коронавирусний халдвартай холбоотойгоор маш олон монголчууд эх орондоо ирэхийг хүсч байгаа боловч ирж чадахгүй байна. Өнгөрсөн зун нэлээд олон нислэг хийсэн боловч, сүүлийн үед тусгай нислэг хийхгүй, товлосон нислэг цуцлагдаж байгаагаас маш олон иргэдийн амь нас, аюулгүй байдал эрсдэлд ороод байна. Ялангуяа БНСУ-д 4000 гаруй иргэд түүнээс 1000 гаруй иргэдийн нөхцөл туйлын хүнд байна. Жирэмсэн, өвчтэй, бага насны хүүхэдтэй гээд хүндэтгэх шалтгаантай маш олон хүн тэнд байгаагаас зарим нь онгоцондоо суухын өмнө нас барсан байна. Монгол Улсад хүний эрх зөрчигдөхийг зүгээр хараад сууж болохгүй. Тэдний эрх зөрчигдсөөр байна.

Тиймээс Үндэсний аюулгүй байдлын зөвлөлд гурван заалт бүхий шаардлагыг хүргүүлсэн. Шаардлагад "Эх орондоо буцах хүсэлтэй, шинжилгээний хариу сөрөг гарсан маш олон иргэд БНСУ, АНУ, Туркэд байгаа иргэдийг яаралтай татан авах, буцах өдрөө хүлээн хоолгүй, амьдрах байргүй байгаа хүмүүсийн нөхцөлийг анхаарах, төлөвлөгөөт нислэгийн хуваарийг урьдчилан гаргаж, мэдээлэл өгөх ёстой" гэж заасан байгаа. Тиймээс энэ шаардлагыг хүлээж авахыг хүсч, суулт зарлахаар болсон гэв. 

Мөн тэрбээр "Миний шаардлагыг дэмжиж байгаа гишүүд суултад нэгдэхийг уриалж байна" гэлээ. 

Б.Баатар