УИХ-ын гишүүн, ХҮН-ын дарга Т.Доржханд хэвлэлийнхэнд өнөөдөр мэдээлэл өгөх үеэрээ хоёр долоо хоногийн өмнө баталсан Ерөнхийлөгчийн сонгуулийн тухай хуулийн зүйл заалт Үндсэн хуультай нийцэж байгаа эсэхэд эргэлзэж байгаагаа хэллээ.

Тэрбээр “Таван сарын дараа бид төрийн тэргүүнээ сонгоно. Гэхдээ Ерөнхийлөгчийн сонгуулийн тухай хуулийн зарим зүйл заалт Үндсэн хуультайгаа нийцэж байна уу,  тов тодорхой туссан уу гэвэл үгүй. Тухайлбал, өмнөх Ерөнхийлөгчид энэ удаад дахин нэр дэвших юм уу.  Үндсэн хуульд бол тодорхойгоор “Боломжгүй” гээд заачихсан байгаа.

Гэтэл саяхан баталсан Ерөнхийлөгчийн сонгуулийн тухай хуульд Монгол Улсын Ерөнхийлөгчийг зөвхөн нэг удаа 6 жилээр сонгоно гэдэг заалтыг 2025 оноос гэснээ нааш татаад 2021 оны тавдугаар сарын 25-наас хэрэгжүүлнэ гэсэн заалт оруулчихсан.

Үүнийг хэний санаачилгаар хийсэн юм бэ. Энэ удаагийн Монгол Улсын Ерөнхийлөгчийн сонгуулиар одоогийн болоод өмнөх Ерөнхийлөгчид болох Х. Баттулга, Ц.Элбэгдорж, Н.Энхбаяр,  Н.Багабанди, П.Очирбат тэргүүтэй эрхмүүд нэр дэвших эрх байхгүй. Энэхүү заалтыг Ерөнхийлөгчийн сонгуулийн тухай хуульд тодорхой заагаач, тусгаач.  Ийм агуулгаар Үндсэн хуулийн Цэцэд миний бие иргэний хувиар хандаж байна. Цэц хуулиа хүндэтгэн, шийднэ гэж найдаж байна” гэлээ.

У.Тэргэл