Тусгай үүргийн онгоцоор УИХ-ын гишүүд оочер дараалалгүй ирж байна гэх шүүмжлэл сүүлийн үе ихээр гарах болсон. Тухайлбал, УИХ-ын гишүүн Д.Өнөрболор, Ш.Раднаасэд нарыг тусгай үүргийн онцгоор ирсэн гэх мэдээлэл гарсан. Энэ талаар Шадар сайд Я.Содбаатар мэдээлэл өгөв. Тэрбээр “УИХ-ын гишүүн Д.Өнөрболор гишүүн тусгай үүргийн онгоцоор ирсэн гэсэн мэдээлэл ташаа. Д.Өнөрболор гишүүн хүүхэдтэйгээ хамт БНСУ руу эмчилгээ хийлгэхээр явсан. Одоо Сөүл хотод байгаа. Гурван хоногийн өмнө надтай холбогдож 2,3 дугаар сарын тусгай нислэгүүдийн мэдээлэл өгөхийг хүссэн, одоогоор тодорхой болоогүй байгаа гэдгийг хэлсэн.

Харин УИХ-ын гишүүн Ш.Раднаасэдийн хувьд тусгай үүргийн онгоцоор ирсэн нь үнэн. АНУ-аас Элчин сайдын дипломат ажилчдаа "МИАТ" компанитай гэрээ байгуулж, татан авсан. Тэрхүү онгоцоор манай таван иргэн ирсэн. Үүнд УИХ-ын гишүүн Ш.Раднаасэд гэр бүлийн хүний хамт ирээд одоо тусгаарлалтад байгаа. Гэр бүлийн хүн нь сүүлийн жилүүдэд маш хүнд өвдөж байгаа юм билээ. Мөн түүнээс гадна хоёр иргэн Инчеоны нисэх буудал руу нэвтэрч чадахгүй хилийн завсар 10 гаруй хоног гацсан байсныг тус нислэгт багтаасан. Харин нэг хүн нь эмч ба биеийн байдал хүнд хүнийг хүргэж өгөөд тус онгоцоор буцаж ирсэн. Тиймээс тусгай нислэгт ар, өврийн хаалгаар хүн багтаасан зүйл байхгүй, зохих шаардлагын дагуу нислэгээр ирсэн.

Бид тусгай нислэг, УОК-той холбоотой мэдээллийг иргэдээс нуудаггүй. Аль болох ил тод байлгадаг. Тиймээс миний бие шадар сайд болоод тусгай үүргийн нислэгийн хуваарийг ил тод болгосон” гэдгийг онцолсон юм.

Р.Алтан