Сүүлийн өдрүүдэд БОАЖ-ын сайд Д.Сарангэрэлтэй холбоотой таагүй мэдээлэл цахим орчинд тархаад буй.

Иргэний хяналт: ОГЦРОХ Ч БАГАДНА ШҮҮ ХОЁР ОО

Тодотговол Иргэний хяналт цахим хаягт "ОГЦРОХ Ч БАГАДНА ШҮҮ ХОЁР ОО

2020 оны 09 дүгээр сарын 30-ны өдрийн Монгол улсын Засгийн газрын 125 дугаар тогтоолыг баталсан У.Хүрэлсүх, Д.Сарангэрэл хоёр огцрох ч багадах үйлдэл хийсэн байна. У.Хүрэлсүхийн багийн байгаль орчны асуудлыг хариуцсан сайд Д.Сарангэрэл яамны боловсон хүчинг халж, сэлгэж, сольж, хутгахын хажуугаар байгаль сүйтгэх ажлыг давхар эхлүүлжээ. Энэ бол ГОЛ, МӨРНИЙ УРСАЦ БҮРЭЛДЭХ ЭХ, УСНЫ САН БҮХИЙ ГАЗРЫН ХАМГААЛАЛТЫН БҮС, ОЙН САН БҮХИЙ ГАЗАРТ АШИГТ МАЛТМАЛ ХАЙХ, АШИГЛАХЫГ ХОРИГЛОХ ТУХАЙ ХУУЛИЙГ ноцтой зөрчсөн баримт шүү.

Энэ үйлдлээрээ энэ хоёр огцрох ч багадна.

Өмнөх ерөнхий сайд Жаргалтулгын Эрдэнэбат Улсын тусгай хамгаалалтад авсан Тост Тосонбумбын талбайд давхцалтай “Элбэг Орд” компаний 14145 дугаартай лицензийн нөхөн олговор болгож тус компанид “Улаансайр-1”, “Улаансайр-2” нэртэй 2 лиценз өгөнгүүтээ лицензүүдийг Ж.Эрдэнэбат өөрийн төрсөн дүү Ж.Эрдэнэтөгстэй хамтран эзэмшдэг “Хэрх илч”компаниар дамжуулан бусдад шилжүүлсэн (зарсан) үйлдэл. Мөн Засгийн газрын 90,91-р тогтоолоор улсын тусгай хамгаалалтад авсан Ноён уул, Тост, Тосонбумбын нуруунд лиценз эзэмшиж байсан 10-аад аж ахуйн нэгжид нөхөн олговор олгох асуудлыг шийдэхдээ уг тогтоолд огт хамааралгүй (Булган аймагт эзэмшиж байсан лиценз нь аль 2011 онд дархан цаазат газарт хамрагдсан) “Азарган гол чонот ”компанийг хамруулж, тус компаний 4 лицензийг нь 8 лиценз болгож олгосон үйлдэлтэй яг ижил үйлдэл болжээ.

Ялгаа нь Ж.Эрдэнэбат албаны байдлаа урвуулсан, ашиг сонихролын зөрчилтэй шийдвэр гаргасан үйлдэлдээ ял шийтгэл авсан бол У.Хүрэлсүх, Д.Сарангэрэл хоёр энэ шийдвэрээрээ ялтан болох нь цаг хугацааны асуудал.

Ийм АЙМШИГТАЙ ашиг сонирхолын зөрчилтэй сайдууд аа Авлигатай тэмцэх газар, Эрүүгийн цагдаагийн газар, Улсын Их хурал яаралтай анхааралдаа авч, арга хэмжээ аваарай" хэмээн бичиж, үүнд олон нийт анхаарал хандуулж басхүү шүүмжлэл дагуулад байсан. 

Д.Сарангэрэл: Намайг бүх талаар харлуулах санаархал явж байна

Тэгвэл БОАЖ-ын сайд Д.Сарангэрэл дээрх мэдээлэлд тайлбар хийлээ. Тэрбээр "Сүүлийн 3 өдөр зохион байгуулалттай явж буй гүтгэлэгт тайлбар өгье. "Чамин алт" , "Мон-Ажнай" , "Жи энд Юу гоулд" гурван компанийн үйл ажиллагааг зогсоож, гол мөрний урсац бүрэлдэх эх, усан сан , ойн сан бүхий газартай давхацсан эсэхийг мэргэжлийн баг шалгаж давхацсан хэсгийг хасуулсаны дараа үйл ажиллагааг нь хуулийн дагуу сэргээсэн болно. Тухайлбал, 2009 он буюу урт нэртэй хууль гарахаас өмнө олборлолт хийж байсан "Жи энд Юу гоулд" ХХК-ийн урсац бүрэлдэх эхтэй давхацсан 77 га талбайн зөвшөөрлийг хүчингүй болгосон. "Чамин алт"-ын тухайд урт нэртэй хууль гарахаас өмнө ашиглалтын үйл ажиллагаа явуулж байсан бөгөөд нөхөн сэргээлтийг бүрэн хийлгэх гэж байна. " Мон-Ажнай " ХХК-ийн нүүрсний талбай урсац бүрэлдэх эх, ойн сантай давхцалгүй байна. Энэ уурхай Хөвсгөл аймгийн дулааны цахилгаан станцыг нүүрсээр хангадаг. Ийм л юм. Тиймээс бид мэдээллийг олон нийтэд нээлттэй тавьсан .Хуйвалдсан, хулгайлсан, хахууль авсан зүйл үүнд байхгүй. Тиймээс "Иргэний хяналт" гэх хаягнаас явуулж буй гүтгэлэг ямар ч үндэслэлгүй болохыг мэдэгдье. Зохион байгуулалттай, гүтгэлгийн үйл ажиллагаандаа хагас жилийн турш хүн ардаа корона вирусын халдвараас хамгаалахын тулд хамт олонтойгоо амралт алжаалыг умартан зүтгэсэн үеийн маань зургийг ашиглан цацаж буй нь намайг бүх талаар харлуулах санаархал гэж үзэж байна" хэмээн өөрийн цахим хуудаснаа бичжээ. 

Б.Баатар